《紐約斷背衫》 - 只限於紐約唐人街裡的中國文化

楊曜愷的《紐約斷背衫》(Front Cover) ，即使用上蔡傑克陳清仁兩副華人面孔，但看得出都係全美式的，這不在於拍攝地在紐約，或十句對白七句英文。

淩與Ryan相識才兩天，淩已向Ryan遞上一張相片，說是其當兵的父親到天安門開殺戒前的自拍照：今時今日華人世界電影圈子，幾沒個再夠膽提「六四」這兩字。淩更係又要背負父親滿手是血之原罪，卻又會子憑父貴踏上星途，這種矛盾也是罕見。問題係，自己父親為極權殺害手無寸鐵學生，這比自己係同志更會被美國娛樂界當係醜聞，故竟用此向個相識兩日的人來打開話題實係匪夷所思。

其實唔駛強國人，就識多些少「國情」的香港人睇返，唔少位置都露出破綻：淩係所謂的中國新生代影星，但行事卻沒明星的氣派，如大伙躲進唐人街餐廳徒手吃大閘蟹、旁邊的隨徒助手都係三四十路的土氣大媽阿叔。好簡單睇返些近年的強國時裝電影，例如陳凱歌的《搜索》、馮小剛《非誠勿擾》，都知強國起碼中產都唔會如此派場。最重要淩對Ryan要求：「我不要穿西裝，我要展現新中國。」其實楊曜愷究竟知唔知甚麼叫「新中國」？仲簡單聽過首《沒有共產黨就沒有新中國》，都知「新中國」就係「共產中國」。今時今日中共國都已全民走資了，做咩仲要把連強國人自己都拋進垃圾桶的價值觀拿返來當時尚？

這些就係電影的敗筆，楊曜愷想營造中西文化衝突，但所謂的中國文化，係停留廿年前的、係只限紐約唐人街裡的。淩與Ryan對談時，Ryan提過童年時白人都會惡作劇地問他父親是否共產黨，楊似料不到這也反諷自己都如那些白人，沒做好功課了解，於是所謂的中西交滙，只係一場美國內部文化再交流而已：電影裡的廣東話或普通話，可以搵唐人街裡的居民去講、譯作英文的中國成語，係早年如楊德昌等留美台灣人譯出來、但真係由「新中國」而來的，就除了「六四」，就再沒多一件過來。

最後Ryan沒強迫淩「出櫃」，反打圓場保住淩的星途，這卻又展現美國能包覽到各種文化的要素 - 包容。你包容到我係同志，我也包容到你的虛偽，這才是所謂的大愛。事實上，楊曜愷要拍出真正中西交手，係難做到，因為中國文化好的，美國佬都會把它包在自己文化裡，沒包進的，中國人都唔會好意思拿出來丟人現眼。