《東京的士：回憶里程》- 想落辣椒油的清湯腩

 

山田洋次九十歲作《東京的士：回憶里程》(Tokyo taxi)，沒聽清楚是否就此封筆，小弟自己也不敢為其咬定：畢竟阿倫雷諾九十九歲也執導，況且或又踏中某人尾巴叫其大罵我歧視佢，費時了。

 

但都係要說：電影就係保守，還守得過四年前《電影之神》– 故事本來改編《美好走一回》（Driving Madeleine），主演倍賞千惠子木村拓哉蒼井優，都係山田用過，主幹倍賞木村的交手，像《娼年》裡鴨松阪桃李和老婦江波杏子的收斂版 – 都係拘謹地服務女客，女客係客就可以稍放縱滔滔不絕，男人因客人為先就和應為多。 

 

電影沒有兩角之間有激烈矛盾交手火花：香港觀眾或覺這的士佬該找林雪黃秋生或《激戰》張家輝有咁爛得咁爛來演，等倍賞回憶舊事時被的士佬左駁右寸先過癮。當然你駁山田不旨在此，他想講的時代宿命、母親堅忍負重、男人之苦、家庭價值等 - 就係山田趁此回顧導演人生，正如倍賞自知大限就至，就借的士佬來總結一生。 

 

《東京的士：回憶里程》就似碗清湯腩，如《我的完美日常》咁只木村一個的士佬紳士般揸的士就只係清湯，倍賞回憶以往就係牛腩，叫你可咀嚼，但成碗都係清。你嫌沒味就想加辣油，叫旁人笑你根本唔識品嘗。故此我說這戲保守直講就係悶，抱歉我係個思想上的窮人。