《夜王》- 但凡見利莫忘義

 

黃子華口講唔再棟篤笑，事實上繼續做，只係唔係現場無台而係電影銀幕，這次帶他上銀幕係吳煒倫。 

 

子華的棟篤笑，講既係香港價值觀，正如「搵食啫，犯法呀？」去到《毒舌大狀》以為「我最契弟」實係「今日，呢度，everything is wrong！」- 社會才最契弟，今次《夜王》（Night King）子華對白依然多，但要論價值，主要係他演出來。 

 

子華做東日夜總會經理歡哥，電影盡現夜場裡燈紅酒綠，但要概括歡的日常工作：就係「捱義氣」- 要顧掂自己旗下被評為垃圾的小姐，就算跟其日子尚淺的葵芳（蔡蕙琪），聽其爭大耳窿數都話借就借四十萬糧，其解對員工好佢哋先會落落力做嘢；但有牙齒印的前妻V姐（鄭秀文）亦係知其落難都唔乘機踏多腳反係相助，你話歡只係中央空調大暖男，唯佢對土地（楊偉倫）亦都咁上下。 

 

義係子華想論的香港價值，其建立於武俠小說、《英雄本色》、「古惑仔」等，縱使你覺這只係男人崇拜英雄浪漫主義，唯卻就影響香港人的行事觀。戲裡叫唯一反派的太子峰（盧鎮業）：做嘅就係背信棄義，故其最後中圈套，就係見利忘義的下場。 

 

《夜王》或係子華定吳煒倫，見《毒舌》的「everything is wrong」已成現實，現實下又該如何自處？道義就係答案，你若不信那趁今日去沙田拜下車公，都會提你「但凡見利莫忘義」。只係《夜王》群女燈紅太耀眼，耀到妳以為成套旨在賣波，卻明明主角係鄭秀文。