《寄了一整個春天》- 借底賣Marf

 

葉鈺瀛的《寄了一整個春天》（Blossoms Under Somewhere）若主題就如此簡單明確：賣底褲，你就不解為何故事像左併右貼。 

 

你會覺得似《花與愛麗斯》，唔止邱彦筒（Marf）陳書昕兩生花，且陳就係禮堂像蒼井優跳起舞；你話賣貨要靠速遞，所以張毓軒此角缺其不可，只係佢那瞓劏房的阿媽有甚麼值得提？故事最似係《同班同學》，且Marf主宰整套戲下，更突顯她的寂寞難耐，所以竟對「客人」有憧憬、那怕張係速遞仔也照吻下去 - 得唔到王子，唔會連木匠的兒子也嫌棄我罷？亦就只兩生花，也就沒三女一個墟吵起上來咁混亂。 

 

但這就講到性，就係賣底褲根本係借羊頭：為何張得知Marf搞賣底底，卻對其不置可否？唔係鋪排張係正人君子，而係就對小弟這男人，我也不解為何一條二手底會值得一擲千金。制服反不難令人理解，就算女觀眾只要睇翻《強姦2之制服誘惑》的馬德鐘都答到你點解。你問栢天男會否同樣答到？硬要給個解釋：成年男人想以最低風險親近少女下體，買底就是方法。或者可叫栢做一個索一索舒筋活絡去表現，唯其碰著Marf遞上一條他又厭惡拍落地 - 太假正經外在，卻又掩蓋其慾望太過，結果就只標籤嚮往底底只係異類變態，沒深層問為何堂堂大丈夫竟甘願如此變態。 

 

或者電影一開始就不在乎底底，也不在意栢、張甚至陳，因為想賣的就是Marf，又唔想搞《四月物語》空空洞洞，於是叫她扮口吃，唯齋扮看似很累，就係兩女衝突時她就醒唔起沒扮到，於是可併的皆併落。這套似成功突出了Marf，奈何搞到隔離左右皆像棄卒。 

 

有趣的是，底底像幽靈不甘被棄，栢玩報復其實係幽靈纏繞到來，再附上禮堂上兇神惡煞其實怨婦般的訓導，追著Marf問你竟這樣用完即棄。Marf做的就係衝出去把塞滿底底的書包拋出來個仙女散花。唯眾多都窒此結局為爛尾，因為相似情景出現過在吉田大八的《紙月人妻》：宮澤理惠拿起凳擲爆玻璃，就係為了逃跑。 

 

當然，你就只顧Marf的，咁佢最後敢叫有落就好，那管底底漫天飛舞。