《海關戰線》- 逞強的海關、逞強的香港

 

邱禮濤搭李敏的新作遭瘋狂恥笑，話雖林德祿的「陰陽廉」都拍到老廉上天下海槍林彈雨，但起碼最後《G風暴》都會自嘲：「ICAC其實文職來的，又著避彈衣又揸槍又盛，007咩。」人類卻唔會吸取教訓，拿起機槍的《海關戰線》（Customs Frontline），仲要謝霆鋒做動作指導，一睇就覺會係套唔「出事呀嘛」就奇既戲。

要笑的話唔使等到海關被炸到陷包散時都搶住話要獨佔功查大案，而係一開頭兩個虛構非洲國家為爭捕魚權大打出手，某國軍頭出象牙鑽石買導彈潛艇，另國又會出戰機轟炸，竟就只為捉魚，你話爭石油可燃冰重合理點：李敏問題就係常沉迷世界革命，卻就對實況不求甚解，以致很誇卻誇到貽笑大方不自知。

 

所以海關拿機槍搏火拳腳較量已唔算太離譜，當起特務到非洲查案才是離乜譜。但該注意的是，既然講到偷竊別國軍火，那就係國防外交問題，睇過《赤道》都知，莫講話海關，就係警方想自己搞掂核彈，中共都立即派官前來喝住。今次戲裡中共豈會放任香港，重要海關和別國交涉而不插手？

 

近尾一幕恐怖份子挾持貨櫃輪撞向中環碼頭，碼頭附近就係駐港解放軍總部，玩到咁大「正常」老解理應見到就搶住出動：《變形金剛4》中国出兩戰機臨尾飛過維港，《救火英雄》消防員都搞唔掂會叫中国出拯救隊 - 之前萬大事都有中国照住，但這次戲裡中国係消失，完全由海關以至香港自己搞掂。

 

你才察覺邱禮濤作品一直都沒中国影子，《拆彈專家2》炸冧國金機場都係叫唔出老解，正面而論邱禮濤李敏係眾多影人中真正自信香港能自強的人。弊在次主權在昨日已算大忌，《海關戰線》開頭還見未沉的珍寶，今日上映時係廿三條已立，珍寶沉於南海，故邱李打後拍下的香港能如此逞強？難講了。