《堅如磐石》- 本來無一物......

 

你覺得《懸崖之上》太複雜，張藝謀就來個簡單的：《堅如磐石》(Under the Light) 先來就係張國立 (鄭剛) 這港人皆知老戲骨，大家都覺來來去去都係雷佳音 (蘇見明) 于和偉 (黎志田) 三個大男人。其餘女角如周冬雨 (李慧琳) 陳沖 (何秀麗) 都似只來點綴，仲要叫周同雷談一下情，但見四周螢光粉綠，這早唔係《山渣樹之戀》那時了，你又躺到床上卻戲都沒做咁不如咪撚做？

 

電影又係任務型，或該直稱叫應酬片。應酬甚麼？早些年中共搞了項掃黑除惡專項鬥爭運動，中段陳道明這紀委畫公仔畫出腸道了出來。諷刺係更先搞這個的是薄熙來，這金江市一睇就知係重慶。其實掃還是打黑，一睇就知係另類扣帽子：薄用來幹掉文強，只係他最後又被做低，技倆被習總抄走用來全國大掃除。

 

故講係掃黑，其實就係黑食黑：黎志田嘲鄭剛蘇見明兩父子同喜歡反鍋，似諷其扮烏鴉哥卻又唔夠手力反枱；蘇阿頭問蘇為何堅持查案，蘇答他想成為一個真正的警察：口吻似《無間道II》黃志誠問陳永仁仲想唔想做警察，陳答：「我想做好人。」- 整幫人其實都係黑，沒誰比誰更高尚。就算唔刻意擺明堂去掃，近排睇左《紮職2》的都知黑幫相殺係必然，你嫌賣道理教育電視卻還是現實，正如今日又炒了兩部長。

 

相對劉浩良《除暴》還天真地有野心只未能伸展，張還真早看盡一切：劇本一睇就覺沒怎費心思：鄭的副市長聽到掃黑風聲，就做戲意圖買起自己之戲，圖把視線轉到富商黎，不甘被割韮的黎既幹掉自己女婿卻又被身邊人殺著 - 都係《三槍拍案驚奇》或《滿江紅》招數，話庸人自擾已算好聽，講真就係弱智鬥弱智。還要這並不止貪腐市長或奸商，蘇拿著犯罪証據，卻沒立即跑回公安局，而係避到李的江邊酒店等被上門；李阿頭明知她會遭危險而給佩槍，但卻唔係預先埋伏好而係聽到槍聲才三十九分鐘後李被割到一頸血才到，搵戲做搵得太低能。但公安開會又係掛著那個章，即同政協會上市長商人一凡人。

 

掃黑運動期間有句標語：「有黑掃黑，無黑除惡，無惡治亂！」講到身是菩提樹心如明鏡台時時勤拂拭勿使惹塵埃，令人感到煩厭疲累，煩到再頭腦唔靈光的也不禁頓悟：本來無一物，何處惹塵埃？或張藝謀早都醒覺，故話這套係應酬但又唔應得邊度：你以為在讚揚打掃打得夠賣力，卻又暗嘲你唔設個大台咪可連掃地都慳返。