《滿江紅》- 屈與計

 

若你話要杯葛張藝謀，我覺得係最冇理由，原因有三：一來小弟唔認同原罪論，二佢又唔係個件宇宙最強把和平示威講成暴動。故你著人罷睇《滿江紅》(FULL RIVER RED) ，還不如嫌佢片長百五分太長，連帶票價要百元以上太貴。反正社會完善後，再唔需要半賣半送戲飛，人人都識話唔係住個頭。

 

若你又心思思問入完地獄的小弟套戲講乜：跳到最後見係岳飛舊臣在潛伏，會以為係另一時空的《懸崖之上》，縱使人物也多，卻沒那麼複雜，只因幾由頭到尾都被一個叫張大 (沈騰) 的小兵所牽；返到開頭，你卻覺係張版《PTU》- 一宗案件要限時告破，所用招數多如塞白粉暗角打鑊般不乾不淨 - 老吹、裁贓、屈打成招等，但招數給張藝謀會有個概括詞，叫扣帽子，或港譯叫老屈。

 

老屈這手段張藝謀最清楚，就係史實已早有樣叫莫須有，文革時用得最多，時至今日回歸祖國的美麗新香港，會此道的某作家聽為最吃香。想起來某套電視劇有個被指影射那作家角色，該角名計穎妍。待至今日才給張藝謀講通屈與計的關係- 屈係計算後所用之手段，戲裡幾每個角色都在算計，與其話係查案，還不如說是捉緊一大盤鬥獸棋，只係各獸力量沒有既定，狼狗可反咬獅虎，老鼠也可狐假虎威待機吃掉大象，只要你懂得計算。

 

但你自以為會計卻又往往算錯，戲裡你斬我我殺你，多是算計錯誤之結果。其實計得最錯者可算秦檜 (雷佳音) ，看畢電影你還覺他奸臣之名似被扣帽子，但翻回史實他確係以莫須有來裁岳飛。若說是計錯，更合切解係天理循環。故話張藝謀在賣弄民族主義，還不如說告警戒最會老屈之國人，提防作法自斃。

 

你問小弟冇理由杯葛張還欠第三點：就係若我去扣帽老屈，那即就自認我真是中国人，我才不會上這些當。