《過時 • 過節》- 相見好同住難犯賤之家

 

吾友Ah Mo話曾慶宏《過時 · 過節》像是枝裕和某套電影，那是《橫山家之味》- 表面分野在後者總算平靜食左餐飯仲過左晚夜，前者係飯都未開就反左成張檯。或更深層次在英文戲名Hong Kong Family - 梗有些絕對香港特產，是枝還是那個日本家庭都似極有限。

講緊係毛舜筠呢個阿媽，佢係搞到開頭食唔成飯的元凶，開頭上車就不停開火，無事搵事來罵如同潑婦。此異於是枝乃至所知日本電影裡的母親：多內儉不作聲張；毛係令人厭惡，她卻在所不措，只因要做出浮誇來達至：「hey，look at me！」之效。謝君豪亦廢柴至頂，對毛忍聱吞氣到爆燈，卻另轉頭摑兒子罵他目無尊長賣弄父權，仲差過《比海還深》的阿部寬。係香港人先要出力至極，交日本人睇返或覺得做香港人還真辛苦。

 

電影講家庭，但重點未必係一家人要齊齊整整：這家人都有個通病 - 對愈親近的就態度老奉地差，愈生疏愈係外人的就態度愈好，毛尤其最為反映此點：自己丈夫女兒同姪女外頭客人完全兩個對比 - 人都係犯賤之物，愈以為唔會離開的就愈唔懂珍惜，就係你以為佢實唔會離婚就以離婚要脅，人家真和你離婚時你就哭哭啼啼接受不了。

 

先講明，小弟還頗喜歡談善言，但軟弱的她開頭顯得多餘似亂入角色，直至她被放飛機，獨自上山觀日才令人明白其用意 - 點解一定要一家人聚首一堂齊齊整整？小朋友問毛此問題，毛拿怕其曱甴有父親幫忙應對作比喻，聽得出係向細路胡混交差，轉係談去驚實比毛窒爆 - 小孩才需要家庭保護，但大人可獨立自理，點解又硬要同住一起？尤其你明知同住難。談本來都係婚姻失敗兼失業的廢女，就係獨自登山，她才自信可以獨立，唔需回家受盡母親奚落。

 

結局也是巧妙：「傳統」實係謝君豪呂爵安強顏歡笑返祖屋一齊食飯，這套結束就係三邊人各自各 - 既然同住難還不如保持距離，偶然見面反而維持良好關係。曾慶宏能突破迷思，但怕他往後無厘頭遭受批判：某国人才特別強調一家人同在唔允許各自各獨立，話雖這国會有《老獸》去諷夾硬一家人會搞出慘劇，但周子陽咪又只得一個。

 

參考：https://www.facebook.com/ahmo2015/posts/pfbid0VYaHEBPuWAdCL8Np192Nt6WzjKSrzjo9jUhg371exg6EkYM4TXb8dctuNFMqsWuEl