《緣路山旮旯》- 沒種去愛那裡都是山旮旯

 

黃浩然的電影總係有個問題，只係到《緣路山旮旯》(FAR FAR AWAY)，那個問題其實還算唔算係個問題？ 

  

講緊係你以為場景係重點，但黃往往只繪其表面：《點對點》簡直遊客而唔係在地人看香港，《逆向誘拐》係只覺得你靚就俾你的情書。當然黃可狡辯話把場景當主角只係你美麗的誤會，只不過《緣》由海報到內容簡介，都打上沙頭角下白泥大澳荔枝窩澄碧村茶果嶺等地名。卻係沙頭角澄碧村得個講而不入，下白泥只拍一景，大澳唔入柵屋或居屋還不如只拍長沙海灘，荔枝窩算深入點，但你都會計較當梅子林同蛤螗係荔枝窩到底岩唔岩。苛刻窒句：黃若介意舟車勞頓，搵塊藍幕應都做到類近效果，反正場景又唔去到美國國會山莊前。 

 

但黃又可叫你睇清楚：海報除左地名亦打左五女一男 - 照你咁講咁人都係重點，片長只有九十六分鐘你想兼顧得幾多？或者睇返戲名 - 「緣路」真指人的情緣之路，「山旮旯」卻未必實指定某地，咁地方又係羊頭又真係無得好講。 

 

電影主旨係考究人的情路為何兜兜轉轉，以岑珈其的毒男作中心，正因懂戀愛就不會做毒撚。如問為何無所謂卻仍未尋到？只因有得揀就唔會有真正的無所謂：說趕三十歲前結婚生仔的張紋嘉，講到似失業是但搵份工做住先；話住沙頭角生癌無人要的蘇麗珊，其實係自以為灰姑娘想隔渣出衝破荊棘的王子 – 都係唔直說出口的騎牛搵馬。 

 

岑的無所謂卻係致命：其實係沒種認定，因此給梁雍婷怒飛，又唔敢正視女神陳漢娜，最後連吻向余香凝都猶猶疑疑。相比《精裝追女仔》的周潤發，縱使有所阻礙，但因為無懼所以追張曼玉會係一條大直路。岑左顧右忌又守株待免 - 就係唔敢吻向人只待人家吻你，也就繞遠了路，自然那裡都是山旮旯。

 

沒種又豈止岑珈其，余和陳曾寧談起岑的過往：「......o個年你知咩事啦，佢咪就成日落旺角影相。」港觀眾都猜疑o個件事係指雨傘還是魚蛋革命，黃浩然會窒問你覺得直講出口會過到依家的電檢？咁你不如直認和岑沒兩樣，都係多番考量到所謂最大公因數，而唔係一鼓作氣。故此係咁話香港真係好靚有咩用？就如陳漢娜放在你面前，你都係愛唔起。