《敗犬拳王》- 廢柴物語，燃盡香煙

 

睇慣《激戰》的你會嫌武正晴的《擂台物語》有夠難睇，咁上下夾埋四個鐘的《敗犬拳王》(Underdog) 應該仲難頂。 

 

善心地諗：除了拳擊，武正晴係想用食色性也來連接《擂台》同《敗犬》，但就算上集打上三級，性都只係用來點綴，即使你話係伏線來引伸下集，就係唔似《擂台》將食做成起承轉合。唯有講得難聽：「廢」係這套，也是《擂台》到《百元之戀》的主旨，可謂廢柴三部曲。 

 

你都可以辯能否講得好聽點叫邊緣人，唔止hea打的前拳王晃（森山未來），還有早年反叛種孽的龍太（北村匠海）、被彈沒出息的二世祖瞬（勝地涼）、被渣男家暴而虐女的妓女、口吃男馬伕到欺善怕惡的古惑仔等 - 一大班各有問題的人，雖有「正常人」如晃龍太瞬的前妻女友兒子，但都係唔顯眼。而講下層卻又唔係懶關懷的《麥路人》，反而像盤鬥獸棋都要你食我我又食著他，就係我下流沒差，只要有人比我更下流。 

 

你話唔係岐視弱者，而係武正晴講得太自暴自棄：見晃似就只輸一場就自甘魚腩，似如《百元》《擂台》般我廢唔使給你理由，只係來到今套，就係上集千夫怒指打假拳，回家就落淚自覺已盡力 - 似嚷每個弱者都有自己的苦衷，始終只己廢只係自己的事，畢竟晃也沒連累他人，就是不會同情，也無需刻薄到底。 

 

但晃和龍太的對決又矛盾於上一段：晃醒覺被指係廢唔係夠魚腩，而係沒在擂台上拼到底。《點五步》講既：「沒叫你贏，但唔好放棄。」似就是這種意思 – 戲裡許多人都在食煙，大家都知食得一半就拋係浪費，就要燃燒到尾才有意義。最後晃還是沒贏，但大家都知他今次係拼到底，結果問題也似一下子燒掉。 

 

要正面總結《敗犬拳王》：就係若你嫌《激戰》《點五步》過分浪漫不切實際，《敗犬》就係踏實地同情弱者，卻同時勸勉弱者要盡力扭轉一切，知你搞唔出紅紅大火，但也請你燃燒到盡。但你亦可能仍會計較：拍電影的地方仍係太平盛世，繼續廢柴也沒所謂，但我們這個看電影的地方，還不拼勁去贏就隨時被灰飛煙滅了。