《狂舞派3》 - 睇返人地為夢想去到咁盡你就知自己講緊老土野

 

《狂舞派》八年後，黃修平拍出了續集，且一跳到3 (The Way We Keep Dancing)。2去左邊其實唔使理，因一睇就知係杜琪峯《高海拔之戀2》的玩法。 

  

公允講續集唔只係抄冷飯：顏卓靈已被零零後視為中女，蔡瀚億楊樂文更係三字頭，他們已談不上年少輕狂，所以就架構《狂舞派》係呈一直線：年輕無負擔就會為夢想標杆直跑；《3》係循環：人到而立總會考慮很多，就會翹住雙手，低頭原地在轉。 

  

電影明顯係二零一九年前之作：表面講舊區重建到地產霸權，內裡就係夢想碰到錢就會變質，也就為生計要向現實低頭，即去返李志倫《起勢搖滾》個隻翳悶。此文標題夠膽彈這套實是老土野，只因二零一九年六月後，無數人為著更好香港的夢想，坐牢到付上性命都在所不惜。睇返人地真去到咁盡你就覺自己夢想阻力只係小學雞，自己原地轉唔係深思熟濾，而係畏縮不前。

 

或者你會幫黃修平辯駁：《狂舞派3》本來就唔係為著潮為著型，而且講3字正係要講3字頭的人，就是舊日為夢想拼盡，到今天就只有舊夢。若是如此，我也想到了有4的話又會是甚麼故事，也就係戲裡的《3》預示左：甚麼戰爭中的愛情，卻就係戰爭毀了這座城市，幸存的人在廢墟上起舞。為甚麼小朋友最有資格談hip pop？因為小孩係甚麼都沒有卻也是沒有負擔。就係你要盡失一切，你才會向小孩學習其謙卑。

 

真開拍4之時，顏卓靈也該是個四字頭，也是香港經歷一大陣痛之後，但到時搵食到地產霸權，已叫微不足道。