《熱血合唱團》- 又係你呀獅子山下？

 

小弟一直叱叱稱奇香港人點解咁撚鐘意《獅子山下》，明明廣東歌N咁多首，甚至既然雷頌德o係度，你問佢借隻《我的世界》來唱都好呀。所以要數《熱血合唱團》（Find Your Voice）最貼地一幕，實係一開始練唱《獅子山下》時，大部分年少的都嘻嘻哈哈無心去唱。

 

雖然電影更早於二零一七拍成，但始終就係《大師兄》那套路 - 熱心老師對著地底泥學生，學生問題由暴力戀愛太過天自閉成積差，再拆其背後家貧四壁到家長唔撚理等。老套野都唔及得劉華懶正氣凜然般叫人唔順超，其仲好意思一開始叫嚷學生無心唱就早走早著，反正最後你都自供係利用學生作自我逃避，咁不如聽到學生老實答入合唱團只為唔駛測驗撤消大過時，你都Hea回句：「哦，是撚但啦。」

 

你又問《獅子山下》在這裡又唔係合唱團主唱之歌，做乜要窮追猛打？講到口臭都要再講：《獅》係七十年代彼此一窮二白時傳唱來同舟共濟，至到今天那群那些年的成為上流人物，又向返時下年青唱這歌叫佢地學習屈就，即係搵笨柒。所以少年煩惱唔理係咪維特都又係個幾味，只因少年都係被利用去講來讓人獵奇，而唔係有心探討他們的故事。戲裡上流人物係咪都嫌低下階層學生無得救 - 早在《五個小孩的校長》時就已懷疑關信輝在蔑視下層，在這套更已表露無遺，難怪講時下青年總感講得離地萬丈遠。

 

就係你企上獅子山上卻以為看透山下的人：正如回美國自首卻要坐頭等，在貴賓侯機室自我陶醉指揮竟博得掌聲，卻叫現實觀眾看到得尷尬癌。還不如在公眾侯機席如此作叫旁人恥笑以為神經病，但何需理會旁人？反正你自信終於贏返一次了。若關信輝了解到這套，他才算回到山下腳踏實地拍戲。