《阿索的故事》- 無心講巴，不如只講蔡潔加辣椒醬

 

就係一個睇葉念琛多年的人，理應有哂心理準備。但對一個唔知葉是誰的巴迷，《阿索的故事》(The Calling of a Bus Driver) 實睇到佢地拍檯拍凳。 

 

知你拿巴士做羊頭，但好歹成間巴士公司贊助你，你都唔會好好地做功課，僅有幾段講巴士的都錯到利物浦：阿Bob一路揸巴士一路同蔣九索（王苑之）吹水吹全程 – 乘客於非緊急時唔可以同司機交談。最後就係北角碼頭巴士總站等車去中環卻企錯去柴灣個邊 – 個度從來都冇巴士會開向港島東，而且你趕落中環見客點解唔落返英皇道搭18x而偏要搭慢過電車的10號？這些已是有時會搭下巴士的都知，叫人覺得你都冇心講巴士，咁不如講多兩錢辣椒醬？ 

 

就算辣椒醬功課做得夠足，成套戲都呈個唔知想點的狀態，葉好似左想到CD鋪右想到芬蘭北極光就唔理三七廿一擲落去，於是就搞到老公要睇住CD鋪老婆要睇北極光結果就離婚，或者會有些少女死忠會受個句睇得出個男人究竟係咪愛你，但相信大多數尤其男觀眾只會覺得你搞乜撚春呀到底。成套九唔搭八野甚多，多到就係話扮巴士司機的王苑之好後生好靚已係叫得上似正常的一句。 

 

相對王苑之，蔡潔更似是主角：大陸妹琪琪左拿右搶乜都貪，搶到陳志高（梁漢文）重專登請索來婚禮，仲要係廁所度講一堆所謂大道理 – 彷似拿廁格打油詩當葵花寶典。情節異常荒誕，笑到夠皮後冷靜稍看這紅當當的蔡潔：這豈不是現在中共的模樣嗎？香港人不論索還是陳定係李振民（姜浩文），都被這個不講道理的琪食住。最後就係香港人始終都是孫悟空反搞掂了琪，雖然過程都係夾硬來。 

 

或者葉念琛就知道國安法遲早橫空出世，於是故意講得夠爛，來掩蓋中共與港人鬥法的寓言。雖然我不太相信這點，因為葉的戲路一直如此突兀。縱使預計往後評葉作都要帶著厭惡，但還是想勸其還不要坐這山望那山，集中注意一兩樣去發揮：正如辣椒醬只要唔冷落在潮濕的地方，咁就食得落口咪幾好。