《獅子山上》 - 兄弟爬山各自努力

《獅子山上》 (Lion Rock) 似係套會令你問我究竟睇緊乜既戲：只要你唔讀一下故事簡介就入場，看畢你竟會嫌九十六分鐘也太長，其實十五分鐘已講哂？

你還以為這套就講一個運動員交通意外後殘廢，因而自暴自棄，再而因甚麼振作，故此努力鍛鍊隻手上獅子山：本來你照這公式架構拍完就行沒甚麼難度也沒甚麼好講，但梁國斌似就玩野，把些似唔關事的發大：醫院的嬉嬉哈哈佔四分一、交通意外索償佔四分一、回想從前又佔四分一、餘下四分一就係施施然講我要爬上獅子山。

要梁國斌解釋，佢可以話這都係依照黎志偉的真經歷來講，你都吹佢唔脹；但睇過《死開啲啦》，都諗梁唔係就咁搬字過紙交功課。電影氣氛一如上套詼諧，只係上套要諷現世又似太白，今鋪正好有件「真人真事」作羊皮。

開頭紀大偉 (林德信) 騎住綿羊仔在公路上唱《紅日》，繼而炒車：《紅日》係等於《獅子山下》，於上世紀用來勉勵人的歌 - 「我願能一生永遠陪伴你」就如「同舟人 誓相隨 無畏更無懼」。來到今天再播，你只會想起唱《獅子山下》那個早已仙遊，《紅日》那個送禮給曼聯卻遭拒收，這叫你會記之經典事已係十年前，肯定係他已放棄香港，香港人老早放棄了他。

但香港人心裡仍抱著《獅子山下》唔放：交通意外案開庭時，大偉沒照律師吩咐堅持講有打燈，唔係唔記得，而係見到喊濕兩包紙巾被告個家人，就覺得大家係同舟人因而要互解互諒。律師怒吼妻子埋怨佢咁玩法，其實真罵的是：「你咪俾人搵左笨囉！」。

不嫌其煩再提大家一次，《獅子山下》係大家一窮二白時才來傳唱互勉，九十年代大家富了起來就用《紅日》取代，但內裡仍諗住：「你覺自己慘時想想其他人或更陷家剷。」這就點解今日左膠一街都係，搵笨依然係香港核心價值，就係香港人顧唔掂自己總想顧住其他人：現實如即使前方障礙多多，但你卻驚你任職的公司無左你唔掂，因而不顧自身安全跨過去返工。

別要搞錯梁國斌提倡各家自掃門前雪，而係提你獅子山下體根本無野好睇，大家目光都應在獅子山上：你想生命照亮生命？你爬到上去咪照亮到其他生命囉！就係要捨棄左膠那種同沉底下相憐，要作右派自強再而喚醒大家 - 所以話電影只需十五分鐘，咪就係即使俾夠你幾小時你都只在山下流淚心酸，你咪又係甚麼都不是，但十五分鐘你就爬到上山，你甚麼都是了。

所謂兄弟爬山各自努力，梁國斌就如此演繹。