《催眠．裁決》 - 一橋能抵千金

應該係爾冬陞好心給多點機會人，《催眠．裁決》 (Guilt By Design) 只有九十分鐘卻用了三位導演 - 黎兆鈞、施柏林、劉永泰。一來要分邊個拍邊Part還不知怎去分，二來誰說三個臭皮匠一定勝得過諸葛亮。

催眠做大茶飯唔係新鮮題，十多年前陳木勝《雙雄》已叫黎明玩過一次。至於這套又係點玩？其實就係《十二怒漢》搭《救參96小時》，也叫解釋點解用上三個導演。坦白講動作戲其實多餘且戇居：後部想曬直升機懶型，因而講到堂堂大富豪竟沒十個保鑣出來做擋箭牌，搞到自己要被追殺埋一份，咩傻的嗎暴發戶來？

講到《十二怒漢》，就係場景本該困在一間房，叫張家輝勾出每個人的弱點而操控他人，這本來係故事主幹，三導卻都係技窮 - 張催得如何把炮都不能隔著電話催埋大奸角令女兒脫困、更要堅持Happy ending而不能寫得狠心。也就解釋為何講講下催眠也要玩埋槍戰追逐直升機：你說只要寫出一筆就能省下那千萬的一大筆，但就係寫不出來，就只用大花銀紙去掩蓋編劇的無能。

說爾冬陞係有心人，就係當大眾都以為文字價賤，爾就此告訴你出色的一橋能抵千金：想到就能刀仔鋸大樹成美談，想不到就唯有大駛錢卻庸俗無聊。講到此，你還好意思看輕文人？