《小Q》 – How to make it simple?

沒看過《小Q》 (Little Q) 的原著，都懶得睇返，那我就唯有當這套係羅永昌自己意念所出的。 

羅永昌唔係新手上路，只係看過的上一套已係十年前，叫《報應》，還記憶尤新，只因劇情太吹漲。正面而看，係銀河影像一次想小本刻劃人性的實驗，始終要成功總要有過失敗做老母，只係磨劍十年，羅又會否拔劍成功？

電影重點係卡士蘭 (Sor……任達華) 與狗，表面睇似《淪落人》，又一個自暴自棄不願接受現實的大男人，狗係啞口無言，但仍要和男人有互動：男人接受不了自己的處境遷怒於狗，當他發現狗也需要他照顧，沒比他更高尚時，他有點滿足，態度也開始轉變了。 

任達華本來係唔想要狗，只係他家人覺得他要硬配給他；正如小Q考試成功，係真想做導盲犬還是覺得小袁澧林太煩膠借機走佬？沒人會知，只因「子非狗，安知狗。」但後部小Q臨終時，眾人七言八舌又彈出句：「很多人以為導盲犬要整天工作很慘……但整天也可陪著主人對牠們也是一種辛福。」這又繼承了《毛俠》的自以為是，擅幫不能言語的動物出答案。 

羅永昌仍然解決不了的問題係想make it simple卻不懂得如何做，唔係講緊畫面一時飛去北海道一時又在香港航空之機上 (我就知係賣廣告) ，而係唔識講少兩句，開放給觀眾自己思考。就係太負責要照顧頭腦簡單的觀眾，於是當自己動物傳心師夾硬講出口說狗很快樂，又係自找麻煩的可笑。 

奈何小弟觀影時，卻聽到後排有人流馬尿，記返起這裡是你夠膽話自己識同動物傳心，你都可呃到盤滿的地方。你問羅永昌今鋪算唔算成功？Ah……算既，因為這裡叫香港。