《沉默的證人》 - 西人話黑警黑暗醜惡仲好撚蠢

有時還真係時勢造神片，正如Renny Harlin在香港拍的這套，在早幾個月前香港國際電影節首映上，該是恥笑聲四起。但換到這個八月，影片依舊，講的卻下下到肉應景，看來實會有人以為此表面來華搵銀之西人，實係反華亂港之外國勢力。

《沉默的證人》 (Bodies At Rest) 本來就連題目都唔緊扣 - 戲裡活著的角色沒個沉默，只有死人先唔會出聲。但講驗屍破案又唔集中，即係戲名根本係過橋，實際係一座大樓內的貓捉老鼠；Renny Harlin本來算有自知之明，自知唔熟香港，場景就盡在葵涌公眾殮房，演員除楊紫任賢齊其他都係香港人。但錯漏都係避無可避：衛生署的電腦可查閱警察資料？兩CID帶一「藍衫督察」去掃毒更係唔知咩玩法；張家輝的老婆被殺又似係無野搵多兩句講的無謂話。

重點還是任賢齊扮的黑警：本來只要及時把屍體收藏、或造多些不在場證據，就唔駛勞師動眾去搶屍；又話要靜靜雞，卻愈搞愈大鑊 - 這些粗俗而言就叫好撚蠢。兼且行事暴戾魯莽，對下屬又冇情義。早幾個月如此敘述，或仍有幾句噓聲，誰不知這幾個月現實看到之香港黑警，真是如此模樣；張家輝的法醫，又似是代表真法治，與假法治真殘暴的黑警鬥法，最後還是邪不能勝正。

話《沉默的證人》係柒有柒著，柒話警察豈料黑警真如此柒。但著又著唔哂，法醫鬥黑警仍係寄望精英，此與今時今日的全民戰爭相左。假若唔止係法醫，而係戲裡所有小人物，一齊聯手搞掂黑警，或才有大快人心之效。