《空手道》 - 古惑怕輸還不如認清自己

若杜汶澤係要造出一個全新的鄧麗欣，那就不應用上《空手道》 (The Empty Hands)。

要用武功令一個女演員脫胎換骨，詠春或是其他都可以。但就要用空手道不特止，還要鄧扮上個中日混血兒，兼且成日食一蘭 (未免太硬銷了)，和日本扯上太多關係，就係令看得電影夠多的會嫌你的故事唔係全新 - 就諗到武正晴的《百元之戀》，那就只係在模仿他人，唔算係破繭而出的自己。

兩套故事脈絡似係一致 - 廢柴最終藉上擂台去尋回某些東西。雖然分野依然很多：那套安藤櫻的一子扮得出係爛泥才會看上強姦的毒女，這套鄧麗欣演的平川真理，好歹曾青春可人，才會吸引事業有成的納為情婦；一子沒甚麼機心，平川真理卻生性古惑自作聰明，見份看更都係吹水唔抺嘴；最重要的是，一子的廢講得像我一開始就係咁邊使問咁多，杜汶澤卻會補充廢柴並不是一朝就煉成，平川的廢只因其怕輸，八歲輸了一場就沒打下去，於是就一直沉淪，想靠啃父親遺下的財產過日子，雞連小孩也能把她擊到。

同樣都係的起心肝鍛鍊，為了後部擂台的一戰：一子係因為眼見男友移情別戀，為了尋回自己的價值而上擂台。平川則只係要整間道場到手，不同的唔止係她贏到，而且擂台上完仗並唔係最後：被喻只識打飛機的Peggy繼續努力幫人打飛機、被當沙包的啞狗轉過來擊到對手、平川的前男友呆望破碎的手錶，只係若有所思這麼多......即使平川贏了，她仍然「一無是處」，世界沒當她一回事依舊運行著，這才令她反思要有為起來，因而繼續空手道。

《空手道》其實再回到多年前的《打擂台》 - 要打就一定要贏。另反思這些年來唔敢講贏，唔止係郭子健軟弱，而係你們港人都懼弱。唔去提贏，就係走精面地避去戰鬥。平川真理係一眾廢青、廢老、廢乜廢物的由來，也就係叫恨鐵不成鋼的港人生性。港人有本事卻不自知，只懂窩囊躲避，因而淪為廢物。正如擂台上，平川稍佔下風，卻就唔敢再打，其實只要夠膽打落去，還是會成為贏家。

或許，杜汶澤要激勵港人，才會用《空手道》。因為那句「怕輸，那就想辦法贏。」還是要日本人，正如《KANO》裡的永瀨正敏去講，才顯得擲地有聲。