《驚心破》 - 懶散無膽吳品儒

話「天機」係百年難得一見之「神片」，只因其劇情還真亂來到毫無羞恥地痴撚線。據說《驚心破》 (Heartfall Arises) 終可後繼「天機」，還滿心期待地找個早上趁早(場只係五十蚊)入場一看。看畢又感失望，唉吳品儒，廢話講句你要成為神人係需要努力和亂來的膽量，而你卻兩樣皆冇。

「失望」已開始於電影播放後的三十分鐘：相對「天機」「神」在播完百二十分鐘都可叫人唔知搞乜撚，《驚心破》較為易睇得明：謝霆鋒的馬進鬥連環殺手「將軍」，最後鬥著扮教授車家偉的劉青雲。吳品儒想到大故事換心換肝換埋殺人犯的意識，但極多細節都係懶做功課憑空想像：夾硬話五星酒店內完全禁煙故發現煙頭當線索，做過酒店廚房或保安都會私底下笑到架架聲；拿酒店硬卡片夾硬當煙紙，就輪到食開煙的大笑出來；蔡瀚億飾差佬仔仔話熄哂D交通燈同封哂D路就包保「將軍」唔會潛到入來，喂關咩事？個祈福會唔係o係運河岸邊搞架咩？馬進著做護士的老婆去查車家偉個底，擰轉頭叮個杯麵都唔夠就把資料交到手，喂范曉萱你呢個咩護士竟然可擅取病人資料咁把炮？

到打大佬仲係要分兩轉：一轉在泰國，「將軍」被趕狗入窮巷就爆原來係「孖生兄弟」 - 《殺人犯》式的中段自爆。只係《殺人犯》起碼夠膽死玩不老症，「孖生兄弟」只會叫觀眾大「車」一聲，反而你個只會炸到個警司成身血偏又炸唔碎人的手榴彈仲驚奇；最後車家偉的爆炸直播點知原來錄影機，只係又玩返《中華賭俠》的張家輝早睇左球賽而買葡萄牙。劉青雲呆左望向謝霆鋒，謝霆鋒由哭轉笑的一刻，背後又似響起張家輝個句：「你咁死蠢，唔好做壞人，做返好人把啦！」

返到大故事，又係何謂正義的博奕，「將軍」同車家偉話法律無法制裁真正的壞人，只好「替天行道」。馬進卻堅持只能靠法律制裁而反對私刑。一直以來，港產片講正義博奕都講得太離地，令人難有共嗚：假若「將軍」殺死的正好係個性侵弱智女童的社工，或許意許叫大快人心。可惜吳品儒無運氣講中，說要被替天行道的也只係在東南亞壓榨童工，就唔講係壓榨港人的地產霸權或土共權貴。其實預告片看到只敢炸國金而唔敢炸冧中銀，我就該猜到這套戲的膽量有多高。

回想「天機」還有一絲叫人欣賞，就係在一大舊屎鍍金並公諸於世的膽量。《驚心破》相比還真只值得恥笑，做功課又懶，憑空想像又無膽，簡直要打零分發還返屋企重做。