《同流合烏》 - 雲翔你想要個怎樣的烏托邦？

小弟一直都欣賞雲翔，起碼佢算係香港導演中最能我手寫我心，縱使你挑他寫出的都係又咸又濕，但比起如錢國偉的著衫扑野同「夜場尋真愛」，佢好歹都敢做個真小人。

《同流合烏》 (Utopians) 正如雲翔一貫作風，最尾四人大肉博，叫你臉紅耳熱，縱使你目不轉睛看足八十分鐘你還以為早已習慣。裸體在他電影中早就見怪不怪，只係於今次特別強調 - 上部高勁軒到校園內咖啡店食午餐，突然幻覺身邊同學都裸體示人；明鏡台為他準備裸體船P，初時明鏡台還毫不自在，被明鏡台拉到船與眾男除衫一齊玩，差點以為又重演《安非他命》那場雞姦戲。相對《安非他命》只係男性寫真，《愛很爛》只係各色情慾放埋一堆，《同流合烏》終有個明確的主題 - 裸體的烏托邦。

唔講三島由紀夫的《假面的告白》，就起返聖經創世記一讀：亞當和夏娃食了禁果後，因有了羞恥而穿回了衣服。對雲翔來說，異性戀、同性戀、雙性戀，慾望的伸張都係自然不過的事，係羞恥造成了世間的複雜。造成羞恥的因素中，雲翔特別嘲諷宗教：信奉基督舊教 (天主教) 的祖兒扮演了一個大醜人 - 話日本最偉大的現代主義作家三島係瘋子、與高勁軒脫盡後才叫停話神唔會俾婚前扑野、最後還要報警令高和明差點身陷牢獄。祖兒係件自私的耶撚，平心而論她只因為愛高，不甘高被明奪去而有那些作為。但雲翔卻調侃哥林多前書講的愛是恒久忍耐只係句空談，反問父母若有多個兒女會否只愛一個？其實起碼基督教裡講的愛根本就係講自私講獨佔，只係你班耶撚就係要口講大愛，於是虛偽地從不肯招認。

正如追求民主自由，烏托邦唔係想要就可從天跌落來：所謂與二十一歲男子進行肛交的罪行，其實早在二零零五年已被判定違憲。雲翔唔似沒做好功課而係刻意犯錯 - 高勁軒因與明鏡台的親密關係曝光而受盡同窗白眼，差點前程盡毀，最後也要累及自己母親。追求係要付上代價來等價交換，但雲翔更似係批判人世間自以為是的道德法律，正是對尋求烏托邦的最大阻礙。

這卻係雲翔最大的弊病，他只嘲諷祖兒真係條耶撚，指斥人世間道德還真是個枷鎖，卻沒給個空間討論為人要自設枷鎖而自討苦吃；再去討論返愛，雲翔似係要主張「大愛」，反而唔肯承認愛係自私，又係另一種虛偽：從明鏡台已可看出，佢其實瘋狂大滾友，自說係同性戀卻又有個老婆詩韻，又攬男又攬女。最後高明甩罪後，其與祖兒等的瓜葛，只用場4P大亂交和海邊裸體打麻雀就一切隨風。雲翔原本所繪畫的烏托邦，或係人都可以堂堂正直宣示自己的取向慾望，但擺出來卻係濫交縱慾淫亂大派對。高既愛祖兒也愛明，結尾卻自說自己係同性戀而不講係雙性戀，唔論雲翔還是否真虛偽，最起碼他未能也未敢劃清性和愛，故難怪觀眾都以為雲翔構想烏托邦只係用來淫亂的借口。

話時話若講「淫亂」就係烏托邦也未為不可：游蕙禎都講到年青人要扑野都搵唔到房去爆 - 若然你就算異性戀，只係要行房都要尋求烏托邦，雲翔還真係早著先機道盡這個社會的危機與荒謬。甚麼叫我手寫我心，其實就該這樣。