數年前有套日本片叫《禮儀師之奏鳴曲》（おくりびと），若果這套搬來了香港，首先不是叫甚麼禮儀師，而係叫殯儀；香港人始終很死版，一副棺材前，唔駛講太多親情人生哲理，死就是死，所以氣氛也陰森，就算冇鬼出來，周圍也像有個黑洞拉你入去食左你，這套就係吳家麗獨力上馬的《有客到》 (Knock Knock Who's There?)。
相對於日本，香港的殯儀卻不會如拉大提琴般高雅：賣紙紮的好賭成性唯利是圖、化妝師阿茵遊戲人間唔認真、少東Roy只係因難忘舊情而木納、只係主持義叔仍有一鼓正氣。日本禮儀師初時都接受不了自身職業，後來卻靠做好取得身邊的認同，香港卻是明透視實貶之：除了個義叔，Roy只是為情，其餘至死也唔長進，邊緣到叫你都係放棄我吧，點叫人俾面？
而殯儀也唔賣溫情，陰暗也就賣盡各種人間凶險：妒嫉 (【無頭】裡的妹妹離間姐姐和她的戀人)、貪婪 (爛賭夫妻困死流浪貓製【種貓】)、縱慾 (【屍香】裡郭偉亮賣力飾變態佬去姦屍)，人性醜惡共治一爐。最後妹妹被鬼責到跪地認錯、爛賭夫妻搞不清是否中毒而被殺、變態佬被鬼拉至吊頸而盡。縱使死得唔清唔楚，但卻清楚講明的是，死亡是一切的終結，正如食完飯臨出餐廳前要找清楚數，到死時甚麼冤孽罪行也迫著要找盡，這就是相對於「死亡是一道門」之大哲理。
電影只有八十七分鐘，卻分為三個小故事，以致每個故事講得很是薄弱：【無頭】裡偷闖入停屍間的女記者、妒嫉的妹妹、【種貓】裡被色誘的雷宇揚，都係似一時諗到卻又諗唔得到幾句，亂入一下就不了了之；殯儀係背景卻又講得表面，由主持到紙紮至化妝，每個出來都只是做做樣子：出殯的過程、紙紮有甚麼技巧、以致肉體模具化妝等，都不願每份搬個十分鐘細緻去講，【屍香】裡的重點姦屍變態佬更是與殯儀牛頭唔搭馬嘴。總之編劇寫故事似乎應該專心一點，坐這山望那山的態度當然寫得混混亂亂。
始終吳家麗若真的有心講殯儀，還請不厭其煩做多少少功課，再專注去寫好。你陰暗唔重要，重要的是你如此的薄我點睇得你厚？
沒有留言:
張貼留言