《迷城》 - 林嶺東要寫故事就請先學好點寫故事

未到十年，一個久違的又磨一劍，林嶺東的《迷城》(Wild City)。說是久違，是因這套林親手落筆去編的新作，卻也會叫人記起某些東西：三男一女一袋錢，如此格局，八年前他也和杜琪峯徐克夾份玩過，那套叫《鐵三角》。

若說《鐵三角》是一場實驗，其實不止那套拍完就完，徐克沒玩下去，杜琪峯於一年後再來一套《文雀》，林卻係八年後才交到功課。同樣的是：一班香港男人，同情個可憐巴巴的大陸女人，避過另一幫窮凶極惡的男人之追殺。

當然杜是杜，林係林，相異的極多：錢在《文雀》裡唔會坦露出來，文雀會偷錢，咁就算；林卻是很強調錢：古天樂飾的民一開場就讀白：呢個世界乜都有個價，包括你的良知云云。佟麗婭飾的雲一路逃亡，手還捨不得放下一大箱黃金鈔票。講清楚另一顯著唔同：杜是詩意含蓄要你猜，林係慌死你唔明，畫公仔畫出腸。

有趣的是，林開章明義錢點重要，但電影愈看下去，你卻係愈唔會覺得錢有何重要：民和余文樂飾的聰開始時幫助雲，唔係可憐她就係貪其美色，那想到錢、張孝全的黑幫追殺民等人，只係為其兄弟報仇、民把一箱鈔票捧回到謝天華飾的George面前，也未能到大結局、真的講到錢頂多只限民聰雲三人在漁船上為一箱錢而吵大鑊，要講電影裡一眾人追著錢，還不如說電影裡一班男人都係狗公，追著雲還貼切。

亦如《文雀》，電影裡各人之關係也叫人聯想到現實：雲又如林熙蕾，係可憐待救的大陸人，說得老土；香港人那邊卻充滿層次感：民係代表老實循規蹈矩、聰係急功近利、George常口說要跟法律行事，虛偽無比；大陸富二代輕視人命，說得應景；張孝全的角色最古怪：台灣人在現在的中港關係裡，本來係最置身事外，但在戲裡，張卻比任何人都要落力，甚至叫他開槍打爛舊立會上的正義女神像 - 如果張來自大陸，說甚麼還真說得夠露骨，但他卻來自台灣，卻係亂入到橫衝直撞出意外。

即使唔估暗喻，很多明示細節也是說得胡里胡塗：民聰雲等闖進George家打其一身，雲還說民拍到George毆打她，故民等只在合法保護她，呢句當觀眾法盲的對白其實講來做乜？死裡逃生的雲該得返半條人命，最後卻有閒情當旅行尾聲般左擁右抱再加大合照，痴線的嗎？最後大陸富二代被捕，其家丁如待去陪葬般哭喪，做乜勁？

只係飛車追逐的場面仍叫可觀，也令《迷城》不叫一無是處。或許這場《鐵三角》延續下去的實驗，得出結果係林嶺東還是學好怎去寫故事，又或者還是不要不自量力，編劇還係假手於人才為妙。