《拼命三郎》- 男人的應得

 

驟眼睇《拼命三郎》(Fight for Tomorrow) 又講打拳會唔會太悶，陳大利似唔止想講咁多。

 

譚耀文當風光過後大佬石三郎，似拿返《紮職》的再粗獷一點，不嬲覺佢扮古惑係扮得吃力，就係桑拿場內同兒子石頭 (林家熙飾) 交談，教其人生教得太文縐縐，唔係黃秋生或吳鎮宇的地踎味；唔止古惑仔，還有父子兄弟等，這三郎似係各「男人電影」中抽絲剝繭拼貼而出。

 

當然陳係抄卻不可抄足：香港始終就係細，三郎有車也未能如《德州巴黎》咁一走了之、三郎唔算痴戀前妻拖泥帶水，這也不是《比海還深》的拖泥帶水、若提吳宇森的兄弟情誼更相異多，李萬四 (鄭浩南飾) 唔會李子雄咁過橋抽板，卻見三郎咁尷尷尬尬，就自知欠著三郎想拿拿聲找哂數算，唔浪漫卻似於現實。

 

若《黃金花》係表現一個眼見逆境咬緊牙關的女人，《拼命三郎》想講一個怎麼樣的男人？又講「怯就輸一世」就真係老套，而且打拳又唔係佢。但打拳又唔係無嘢搵嘢講：石頭講自己「失去」老豆老母，想藉打拳拿回屬於自己的東西，這就勾起了主旨 - 為何《英雄本色》Mark哥講既：「我衰咗三年，我等緊個機會，爭番口氣。唔係要證明話畀人聽我威，只係想話畀人聽，我唔見咗嘅嘢我想自己攞番！」今日聽返毫不老套？只因講中男人需要的唔係酒色財氣或一剎那光輝，而係自己拚博付出換來應得的東西。

 

李萬四駛橫手令兒子李大偉 (應智越) 奪得金腰帶，卻搞到其極度不爽，和三郎打了一鑊反轉成間酒吧他才明白：男人既不受嗟來之食，更鄙視不努而獲，甚麼「要打一定要贏」唔係重點，重要的是男人靠自己雙手打贏而取應得的獎牌。七年前《黃金花》怕失去故不擇手段也要贏，今日大概見盡太多不擇手段而贏的事，陳大利或問大家：你還是堅持點都要贏，還是《拼命三郎》咁全憑自己去打贏才開心？