《紮職3》- 你連紮職都唔記得，咁做古惑仔係為乜？

 

我錯了，我曾講過《紮職》點都唔會有《3》（The Unwavering Brotherhood），誰不知《2》上畫時就拍緊《3》，可能有人嫌錢腥，拍到過埋陰陽路去到100咪話冇可能。黃宗澤張繼聰陳家樂有冇咁長命係唔使考慮，反正第一套係陳偉霆，拍過一次後就還不如上国內去唱你是最迷人的你知道吧。當然若真有《4》，叫的士陳玩返都唔係冇可能：反正陶大宇唱《倒轉地球》都唔會唱到發達，還是要有戲就接。

 

其實堅持主題「紮職」，還真可長拍長有，但吳家偉似為交而拍，就主題係乜都忘記：黃張陳一開始食夾棍，同紮職有乜關係？鄭浩南和陶爭話事人這叫選老坐。林千渟還可勉勉強強，周勵淇就簡直亂入，硬要和黃打情罵俏來充撐時間，卻把稍微陽剛味拉到女人戲般刁僑扭擰；若你改口主題實係邊個笠左三百粒，咁仲衰：戲一開始無耐張陳就認係我偷，後部陶更直吐乜野都係我搞出來你吹咩 - 咁鐘意拿冧自爆，點解偏要做古惑仔，卻冇諗過入哈馬斯？

 

表面這套就如《無間行者之生死潛行》咁拍來無謂，若死都要吐出一重意義：《紮職》就如另類教育電視 - 頭兩套教你江湖比夢想更搵笨，來到《3》更是反寸 - 你就係連「紮職」都唔記得，有冇諗清楚留在江湖係為乜？每日無意義的古惑仔，仲戇居過哈馬斯的信到走火入魔做炸彈人。於是你就醒悟，寧願畫漫畫，都型過行古惑。