話銀河映像係實驗場，劉國昌的《無人駕駛》（Spacked Out）就係一實驗品，你問成功與否？按獨特似算成功，但傳承而言卻似失敗因難以為繼，之後有誰搞得出類近作？似乎只有陸以心的《同班同學》。
《無》故事呈散文式，其實就係日記，但當你呃一班MK妹拿日記來投稿當故事好，你都要煩惱如何設起何以告終，亦所以其承轉都唔明顯，推進故事係單靠餅 (譚潔雯飾) 如何過每日，除了望手錶看何時到完場，你係難以推斷何時收結。
電影初出時被評依然由建制出發，但實係無可避免，因劉那時已不年少，成人望未經歷的少女世界就係會用獵奇目光，如拍《給十九歲的我》時的張婉婷，都係八婆地審犯般問女生，話係好奇，只因佢根本沒以這個年歲經歷這一世代。
就算換個年輕女性導演亦未必擺脫這目光，就算銀河映像話生來為拍片，但要維生還需應酬觀眾需要。就係戲裡四少女走私電話搖頭丸到影樓影性感相，幹盡衛道之士非議之事，但根底都係單純地只為搵食。
拍「問題少年」通常都難逃指責口吻，如《過春天》說點都最後要給那少女一教訓。《無》係罕見幾唔會教訓人：四少女最後依然健在，唔駛如《香港製造》要壯烈收場；除左阿蕉 (區文詩飾) 沒再玩Line亂溝仔，或腐乳（潘美琪飾）詩（張詠妍飾）正式散左，四人往後唔似有大改，就係唔需過分反省自責之前的自己，以前頂多只叫遺憾，根本就沒甚麼錯。《同》也是大哭一輪後友誼永固，無須怪責。
《無》唔係數算，反似為年青抱不平：四女行徑心態：遊戲終日走私吸毒玩弄感情，只因對未來沒有盼望，一天難處一天當地等待明天末日。很大程度係環境驅使她們想法，只係話電影刻意醜化成人又未免說太過：教師尸位素餐、父母棄子女不顧，他們也可說係無可奈何，教師會自辯只係打工仔仲想我點樣？追究還真會陷入有雞定有蛋先的無聊爭論，故費時嘈了。
現在人睇返《無》，說是懷勉從前光景，其實很多也只係轉了樣式唔算失傳：玩Line轉用交友app、貼紙相轉instagram、食白粉轉大麻諸而此類。你突覺其實與餅沒兩樣，原該強作恭喜你心境很年輕，但你就知的是：《無人駕駛》，現實講就係前路如吸毒後迷濛，睇唔透亦唔到你掌握，廿年後，或我或你或當年的少女都變成四張中年，仍都係睇唔透前面，也似哭到在一樓一前不知所措。對，電影結尾係餅說了句：「媽，你幾時先會返來？」 你話餅對將來完全沒盼望又唔係，只係這期待卻似遙不可及，正如現在香港人心底所盼望。
沒有留言:
張貼留言