玉田真也的《喜歡這個我》(I
am What I am) 講無性戀者，你或覺得用三浦透子去演似偏向易走，要挑戰還不如叫北村匠海當主角，雖諗深一層又未必。
以動物本能而論，男性才比女性更望傳宗接代，故所以有狗公未嘗聽聞過「狗女」，而戀愛就當係把求偶禮儀化。故用北村比三浦更具挑戰在要說服觀眾：佢唔係以無性戀來掩飾自己只係溝唔到女的毒撚。你話都有敗犬之詞來諷嫁唔出之女人，傳統都視寡婦鰥夫為弱者 – 人都唔想被視為失敗，所以觀眾會計較你的無性戀是否係掩飾失敗借口。
你話這世間也有坦白面對自己性無能，也如《美食偵探明智五郎》裡小池榮子扮的抹大拉的瑪莉亞所言：「年紀愈大就愈不會做愛，但食飯係至到死為止。」性同愛並不掛勾，老人或性無能都會愛人或想被愛。若戀愛唔係能力比較而係與生俱內的渴望，那解釋無性戀就煩惱在唔限於應對三姑六婆閒言閒語，還要考量是否會傷害別人：正如你接到他人上房，人家吻向和你表白，你才嚷自己無性戀愛唔到別人，別怪人家氣得拂袖而去朋友都冇得做 - 誰都會以為「唔想拍拖」的潛台詞係「唔想同你拍拖」，人家可費了光陰感情在你身上啊。
這實屬無奈，只因感情不可預計：你會順灘原諒原本應承和你共同生活的好友，只因你阻止不了人家對你動感情，故此你也阻止不了你好友對前男友動感情。你突然覺得其實懶理別人，無性戀者比異性戀及同性戀等更易過活，只因真唔會戀上別人那就只限自己，那用顧及旁人。反正昨日幼稚園生會拍起拖，今日就同同性拍拖，明日就會明白唔同人拍拖都可以：世事轉變比你想像中快，今日你費力解釋，明天就覺自尋煩惱。
何況找到真認同你還真碰運氣：三浦和北村臨結尾相約去睇戲，但係同一戲院分開看各自各一套 - 在戲院裡睇戲根本就不應交談，既然沒有交流，那同坐一齊睇實沒意思。卻就係連影迷都沒多個會明白此點，故叫人明白你，談何容易呢？
沒有留言:
張貼留言