《12日》- 林氏夫婦婚姻日記

 

大家都因為林愛華的經典《十二夜》而看其新作《12日》（Twelve Days），結果搶先早睇的都苗僑偉上身，因而搞到你想在三十蚊戲飛難搶的開心香港星期六睇這套竟真係唔難，你指小弟入場個間戲院本身票價已夠低，我卻說佢低極都要五十八大元，對精打細算的香港人來講平一半都夠理由令你搶過一空嘛。

 

結果只睇「第一日」就已諗到點解通街都對這套避之則吉：這天馬志威鄧麗欣說要到離島渡假，卻碰著八號風球，兩人在中環九和十號碼頭被颱風吹到手上的米如雪花分飛 - 就算你真完全唔睇新聞但你都唔係盲嘛，你見橫風橫雨竟仲堅持呆等在個半露天碼頭被吹到落湯雞？同埋你去邊個離島要專登買餸入去煮，若你話係露營那仲好笑，竟然只帶餸卻係帳幕煮身架生都冇係手。就這一場已即叫心諗：「做乜鳩呀係度？」

 

跟住就係拍拖時遇著「土地問題」：攬鍚到死痴人地餐廳將檯而不知尷尬、唔識用「愛勾搭」之類app訂房而排隊等爆房一肚氣；婚後鄧係由窗簾到廁紙都唔知點去買，馬仲要唔識行多兩條街，為眼前小食檔唔找伍佰猶豫不決，仲要妻子親身拿佢飲開牌子的水到其公司，而唔會叫秘書或用網購......這對夫妻簡直毫無生活常識，銀幕前的窮撚卻生活經驗豐富觀眾，定愈睇愈唔耐煩，即使只九十分鐘都覺坐如針氈欲拿冧起身走人，難怪只三十元都沒人想花在這套。

 

你話唔識生活並唔係搞到大家都怒喊「媽，為何結果不是我想的那樣？」要點，而係正如小弟問「第一日」在做乜鳩，查實大家都唔明成《12日》都在講乜春。公允而論，《十二夜》與《日》架構一致，都係每日細節來金珠串貫出一段感情起伏，係唔難看明。只係這段感情障礙比甚麼小三定三小介入仲可笑膚淺，老公睇唔起老婆繼續當空姐，老婆受不了老公自以為上等人的嘴臉，但他們口嚷離婚卻拖泥帶水結果還都係復合，關鍵係都係生活白痴的他們才最門當戶對，他們還都有知恥心，再另找他人其實就係搞著他人。

 

其實睇到唔識買廁紙個幕，或沒人諗林愛華識定唔識，反而回想到個件深夜到便利店買唔著廁紙的林門鄭氏，其唔識用八達通，俾伍佰乞兒等，生活白痴度就係戲裡馬鄧夫妻的水平。故《12日》未必係林愛華自述，而係真取於那對林氏夫婦的婚姻日記。又唔怪得講開心香港的今日沒人想看這套：大家看盡那鄭女士點白痴而恥笑一輪後，就來了一場纏繞到今日的惡夢。