《死屍死時四十四》- 你開心返就知道你還未到最仆街

 

今屆金像獎遭全人類圍插係老屎忽分豬肉，我想若此像獎若早被建制控制，圍威喂分野之餘，都要收買定人為建制服務，例如睇中那個新晉。

 

你話我係咪窒緊何爵天，我諗反正我又唔係佢粉絲點解唔質疑得？你問那窒的理由？其投名狀肯定唔係首作《正義迴廊》，而係接力上的《死屍死時四十四》 (Over My Dead Body)。 

 

《死》玩的題材其實老土：死同炒樓，兩題材諗到既，由《維多利亞壹號》、《死開啲啦》數到《鬼同你住》一大堆。你話咁真係橋唔怕舊：就算偉大習總講明房子係用來住人而唔係炒，樓價因愛国者治港令港人走得更遠而大跌，卻係現在是但一個廿歲出頭，都未能輕鬆買樓。佢地入戲院逃避一下，睇到苦笑都係笑。

 

但樓都未係講到貼，何講得最中的是香港人都係自撚私：所謂死屍其實根本未死，只係楊偉倫求其望下就認定佢死左 - 明明佢只係件沒人睇得起的毒撚，此時大家又會諗都唔諗聽信哂；最吹漲係正常應打三條九，但眾人只想到條屍在單位門前就會搞到樓價跌，於是就將條屍擲來擲去，成層十四樓根本就係一班《三五成群》：夾手將條屍擲出街而走埋一齊與童黨埋堆，都係同等的幼稚。

 

只係這班人有樣好，最後還會自認都係一班仆街：若說這部係維穩片，論據就此其一 - 某地的淪落唔在甚麼大法的緊箍咒，關鍵自撚私的一味得個驚趕住想著走，就算你敢於自認仆街，但你怯懦而做的仆街事早就做左，那懺悔又有何用？「死屍」最後叫到救命，眾人還會仆到過去把其救返生：二係話你聽你以為死馬的，其實堅持一下還可救活至活馬，言下意明顯係你以為沒望不如遠去，還不如留下相信黑夜終有終結時；三係既然開心香港，就算橋舊但也叫你開心返D咪好。一套電影搞定三樣，其實給新晉導演何爵天都唔夠，直情要頒大紫荊。