《闔家辣》- 最後一次阿倫食粉絲還是Francis Kwong？

 

原本《闔家辣》（Chilii Laugh Story , CLS）(鄭晉軒導) 係唔駛點評，因為這是賀歲片：作用就係見你過年到無聊想自殺時，用更無聊的叫你嘻哈大笑消去死念。但假若這是最後一套賀歲片？既然有国安大法兼要動態賀年，你就知別說邊有可能。 

 

或者先界定點為之一套港產賀歲片：電影的笑點都在對白，一係玩諧音、一係拿性來玩笑，但叫人笑得最大聲的，係「阿倫食粉絲」，這是你緊貼時事先識笑。相比以前係敢講到李鵬係我地最偉大的領袖，你覺得港片還敢玩至這樣？現實玩時事玩最多的彭浩翔已遠走加拿大，現在恥笑o個個「阿倫」，亦只係過氣廢老並唔係達官貴人。

 

或者其實點為之香港？就係會把中西文化融合，這唔係只在講英文炒潮汕辣椒醬，而係講得出Francis Kwong - 費撚事講。你話如韓寒也會在《後會無期》講陽光沙灘 - son of bitch，但這其實執吳念真 (台灣人) 口水尾。真係香港人才把廣東話和英語融合到出神入化，問題係擅長英文的精英都遠赴英國，留下來的也預感要和英國漸行漸遠。

 

就係戲裡吳君如問要移民的兒子：「係咪有咩事唔走唔得？」兒子面色難過而無言以對：大家都心知甚麼回事，卻無以坦承，畢竟此地坦白自由早已沒有。於是明明視象通話容乜易，但大家像搞到永別。《闔家辣》可能還真係最後一課，就算呂爵安鄭中基梁詠琪到吳君如下年都係度又如何？即使辣椒醬依然都係辣椒溝蒜蓉，但裝的由來佬換做大陸樽，點都係唔同。