《分手的決心》- 蛇女湯唯

 

雖然你知我知大家都知：朴贊郁加湯唯，已經係叫你不假思索買票入場的夢幻組合，但好事者仍會問：點解朴會搵湯唯？ 

 

《分手的決心》 (DECISION TO LEAVE) 會叫你諗起刁亦男的《白日焰火》：又係一男警查一女涉殺其夫，那套女主角係桂綸鎂，你會問咁朴又唔去搵桂？解釋係搵桂成件事會「唔好玩」：桂係由頭到尾楚楚可憐，卻給人覺得扮嘢：一睇就知係你。 

 

湯唯卻係帶古惑：在茅頭指向她時她似會放下身段，問：「我真的這麼壞嗎？」；但當其嫌疑被洗脫，你又覺佢會轉身奸笑：「吓，我都好信？」或者朴更高章就唔使擺屍體、唔使案件重演，只因為湯唯就係一件疑團。就係她在你身後步向，你也會預她會推你落懸崖。 

 

俾你係朴海日你會如何自處？佢似想與湯保持距離，會搬家或搬同事最常就搬自己老婆出來。但佢卻無意走近湯，跟蹤由樓下轉上她家，佢搬走湯亦會找上。你想話引誘你只係案件，點都唔係湯本身。湯唯其實就像條蛇，不需故作甚麼卻就誘惑著人，佢未必故意，但大家總覺她就會如此；男人明明都係亞當，卻自視上帝，覺得唔應就此中計，於是處處逃避。但這條蛇卻帶磁場，即使她深埋海中，亦會吸引你在海灘打轉。 

 

所以結局沒肯定真兇是誰，亦似湯唯在發晦氣：「你定係我咪我囉，反正我就係原罪！」若你係湯唯粉絲或會為她感到無奈：佢或唔想被當係蛇，但朴贊郁找上她，或正因她是條有磁場的蛇。