《神探大戰》- 要旁人皆醉我獨醒，卻又人人醒哂定同你醉撚埋？

 

韋家輝的《神探大戰》（Detective vs Sleuths），算十年磨劍卻負評連連，搞到咁因一開始就有結構問題：天才還是瘋子，本應只得一個。 

 

當劉青雲做天才 (李俊)，林峯做瘋子 (方禮信)，兩個已經夠哂數。若瘋子佔盡成套戲，那就係「天機」或導演叫羅守耀。而且夠瘋還好，起碼可叫作邪典。但你又痴唔哂，只叫人心諗你做乜鳩。 

 

就算未叫得上戲裡人皆瘋，不正常的情節始終連連不絕：大巴駛出皇崗入大陸境，卻叫香港海關越境揸槍截車？你不如叫埋古天樂帶ICAC (「字母風暴」/「陰陽廉」)？重要你竟膽敢當大陸公安死架；屠夫案同魔警案原兇手後代大個仔入警隊做督察，警隊原本的審查機制？重要兩督察再同一大班人自願給個「瘋子之女」張琳 (何珮瑜) 帶著走？你唔好話你走得太前想講警隊內多弱智也？

 

最重要係為何天才瘋子只得一個？就係瘋子完全獨行俠，做事作案只有自己唔顧別人，故此隊冧哂伙伴的方禮信才是真瘋；你以為李俊係瘋子，但他卻又想陳儀 (蔡卓妍) 還是警隊同僚認同 - 天才始終享受他人稱呼他天才。其實兩者都係諗旁人皆醉我獨醒：只因罵同僚廢柴的李表現太強烈，唔聲唔聲的方太內儉。

 

但最後係大案告破，李俊竟被警隊夾道歡迎回歸：「正常」應係警察把功勞自攪，李繼續被視而不見，獨在天橋底扮唐吉柯德。如今你竟以為得叫醒哂人，其實係大家都醉撚哂，咁就簡直鬧劇。當然你係韋家輝死忠還可死撐其早知警隊已係一隊胡鬧，或預知瘋子作主只係歷史運轉。只係雖然林嶺東最後的《沖天火》都痂撚過，你始終唔係羅守耀，你係韋家輝嘛。