《濁水漂流》 - 未嘗躺平，何曉怒火

 

李駿碩的《濁水漂流》(Drifting) 會叫你感到矛盾，就係作為觀眾的你會係只是旁觀，還是愈看愈有沖動想介入去。

 

輝哥 (吳鎮宇) 等一群人，單外在會叫你以為佢地好很慘，睇深一層佢地卻似想話返你聽唔好諗到佢地只有慘字：中段他們的訪問播出街後，「幫助」他們的大學生接種而來，有一群更嚷來陪他們體驗訓街再先向他們鞠躬，但睇得出每個露宿者都心諗做乜鳩。

 

老爺 (謝君豪) 養的金魚似暗喻子非魚安知魚之樂：就算你陪我訓街，你都唔係真係露宿，憑甚麼覺得我只有慘絕人寰 - 好歹我可以搞掂一日三餐，無聊咪吹水捉棋養魚吸毒打發，基本生活所需我都能搞掂。其實我只係咁簡單就已足夠，現在不正有句北方潮語叫「躺平」嗎，是不是你嫌我走得太前？

 

李似想講露宿者和社會間互不相干就最理想，就如《翠絲》般我變性該係我自己的事，現實卻係人都多管閒事造成悲劇：就係何姑娘 (蔡思韵) 好心幫老爺尋親，豈料老爺抵受不了悔疚而自盡；深水埗的新樓又係另一暗喻：輝哥等在地盤附近蔑視爭客而互毆的地產經紀，而新樓的住客也老早睇唔順他們，片頭他們由街頭被迫到天橋底，片尾在天橋底的他們又係被迫遷。

 

其實輝哥需要的係政府的道歉：我係窮人但始終有尊嚴，奈何何姑娘如何熱心也始終幫不了，睇佢唔順的社會更是懶理。最尾他唯有憑一把火去怒吼，這把天橋底的火能波及甚麼，還是始終沒人理會默默而熄，不得而知，只知佢就是吼過。要注意係這電影是在二零一九年十一月拍攝，李駿碩似想呻我們又何嘗唔係另一個被看得卑微的輝哥。