《她和他的戀愛花期》 - 挑

 

沒搞錯標題就這麼一個字，這是我看完土井裕泰導演坂元裕二編劇之電影後即心裡響起一句評語。 

 

但會搞到我如此不屑，土井該唔太關事，反而出在故事即坂元之上。 

 

表面《她和他的戀愛花期》(We made a beautiful bouquet) 是對知道押井守、以及堅持耳筒不可一人分一邊的文青愛的故事。你還以為只係碎碎念把文青生活金珠穿貫來起承，其實還真有轉，合當然分手收場。 

 

轉係很難評，話它唔夠坦白又唔係，畢竟片名已講到明  -  真花一定有期限沒可能永遠不枯，愛到久覺得理所當然就會厭倦，就算沒第三者或是朝見頭晚見黑都會如此；卻又唔可以話它坦承，係講到如有線般你係覺得佢服務唔掂但諗到Cut佢重麻煩，但口吻就似話：「我知咁樣唔太好，但請你知我咁係情有可原......」於是就係分手時應彼此鬆口氣，卻又要回憶當初而相擁並喊濕兩包紙巾，當然有人會感觸，但你亦不能否認又有人會諗做乜撚。你問咁應點「平實」處理？「神片」《The room》裡Tommy同Lisa「I will run through a forest of flames」的拮肚臍敦倫後，Lisa就壁頭對母親講I don't love Tommy because he so boring - 厭就係厭只需坦認，但你一副驚別人覺得你做衰人，於是又要裝副唔想去到咁的模樣，卻就似自打著個婊在自己面上。

 

叫人不可理喻的係最尾的「和平分手」，就係仍同住三個月，彼此朋友相待客客氣氣。現實根本沒可能如此，大家都知所謂愛是恒久忍耐不嫉妒不求自己的益處係漂亮話，真正包含係自私。尤其你知到要分手時卻厚臉皮向對方求婚，嚷一結婚生左仔彼此簡單牽手到老就等於把厭倦難關拋諸腦後，其實你還深愛對方。只係對方卻給出覺得你不切實際的模樣：「一起到老又等於相伴到終？你沒看過《黃昏流星群》？」當你竭力付出卻得不到期望回報，誰也會怒而反檯。但你竟平和與對方共對多三個月，到誰也覺得你會否沒骨氣到個點。

 

你會辯坂元裕二的世界一直都係過度理想：如《大豆田永久子與三名前夫》般松隆子與前夫到女兒彼此如朋友般沒輩份，故你可話這是場沒有愛意的戀愛，吻過敦倫過都可叫只是好朋友。但你片名點都要叫《她和他的戀愛花期》，那就迴避不了這問題 - 講到愛厭左就算，唔駛計較彼此付出，更唔需在意對方的期待，不負責任。就搞到你想追久永久的愛還不如同隻貓談戀愛，好歹誰都教你不應棄養寵物，難怪最後男女分手時都在爭持隻貓。