《分域大道》 - 你太善良

雖然話紀錄片導演只係見乜拍乜，但總覺得也會見風使利：成功的革命當然讚嘆，失敗的革命，好就憐憫，更多係嘲笑或鞭屍。

杜浩綸（Matthew Torne）的《分域大道》 (Last Exit to Kai Tak) 係只靠香港人，尤其投入過社運的才能領會 - 黃之鋒、黃洋達、林淳軒甚至劉偉德何韻詩等間的立場恩怨等沒道出，觀眾要忙做影後功課先理解何謂分域。

或者導演眼中五人間恩怨情仇唔係要探討的，分域也可指唔同路也能條條大道通羅馬，問題係五人冇一個真正能抵達羅馬：以港人對學歷的盲目崇拜，見五個好歹都讀過大學的都沒個做得成摩西似匪夷所思，卻又不是無從解話 - 黃之鋒和戴耀延到華盛頓見美政界，戴笑言想黃被港共送去坐牢，到時會激發更多人上街：就算戰略人其實都係書呆子，沒估錯他們都讀過《曹劌論戰》，卻只會死背而沒認識個中道理。

「夫戰，勇氣也。一鼓作氣，再而衰，三而竭。」雨傘革命爆發時正就一鼓作氣，若七十日後就再而衰，那接下來你話會是甚麼階段呢？結果黃之鋒真被判囚十個月時，頂多有人網上呼天搶地，衝上街頭的一個都沒有。但導演似係誤打誤撞才講到雨革竭息：劉偉德說眼見贏唔到唔甘心，尚當港人都係如此那就奇怪，電影其實漏拍大段，去解釋港人為何心息：若只限論雨革，當其兩大目標 - 推倒八三一政改及梁振英下台，你豈能話這些沒實現過？二零一五年中八三一政改硬膠地大敗被否決，二零一六年尾梁振英(被)宣佈唔連任。港人都係口說階段勝利係笑話但係心裡認同，反正目的似達到，就算現在未必比昨日更好甚至更糟，港人都會收貨明天乖乖上班去。

其實當雨革係革命係抬高，革命係要有革除舊制之決心，但五人有持之以恆想去革除舊制嗎？沒有：四人參與區議會立法會選舉，何韻詩繼續歌手，大家都繼續順從舊制；除黃之鋒繼續奔走，四人都沒再全心投入政治，雖然你唔碰政治政治也會搞上你 - 林淳軒連老麥都唔請，講到係因參與雨革的下場，但他在履歷填上學士學歷才似係關鍵：大學生見低學歷的工作未免太不成體統。土共石房有搵黃洋達隻揪更係笑話一場。總括革命落幕，大家都當沒事如常生活，更加唔需甚麼憐憫。

《分域大道》係太過善良的一套，只用名字道出五人或係或將各行各路，卻沒去正面揭開各人恩怨，表面係唔想論斷誰錯。其實真要論錯，五人共同錯處就如何韻詩唱的Dear Mr. President - 只向壓迫你的祈求而不反抗。若電影真夠狠心，最後定會接入一首張智霖：「馴服就似綿羊 相戀太善良大多打敗仗 / 受騙的那個 比騙徒更混帳」