《功夫女足》- 迪麗熱巴的蹲

 

話雖小弟常言我不入地獄誰入地獄，但都會反思若連戇鳩都睇得出係地獄的，自己還要硬闖有何意義？

《功夫女足》（Kung Fu Soccer）從戲名一睇就知翻炒乜嘢，你話入場為慨嘆周星馳已老，我窒你係咪昏迷左十幾年，星爺由《西遊．降魔篇》老早就已老了。

寫時還憂慮會否有星爺粉絲，或者那為著只0.7套而追斬卻斬錯人又在這套客串球証的男演員，會否衝上來罵我「劇透」累死星爺。但諗落擔憂似多舊魚，港男觀眾該唔會對蹲地的張小斐或迪麗熱巴有胃口，港女都唔會知張藝興是誰，其實星爺若會關照香港觀眾一點，起碼叫佐藤健同這姓張調下位才是，但星爺似只在乎十四億人，七百萬香港人他老早費時理。

講真又係同《假冒女團》咁難評，係明知自攞來賤何好意思大彈，唯好更係講唔出口，就不如論點比不上《少林足球》：同樣係無厘頭，唯《少林》係人跌落谷底，自我奮發打破黑暗贏回尊嚴，看的其實係大快人心之爽。《功夫》卻完全表現唔出鬥志，只係一班八婆終日嘻嘻哈哈吵鬧，且挫折只限中間輸一場，就如《電競女孩》咁贏唔贏都沒所謂，換來就係叫人好不耐煩豈論爽感。

只係星爺還真係奉承大陸人？真的話難以想像會叫迪麗熱巴來個一秒變大媽咁蹲下，或者就如《新喜劇之王》咁，你以為星爺技窮，其實他只係換個位嘲笑，難為自言睇足星爺咁多年的你們竟如某国人一樣睇唔透。