《白日之下》- 無力的九龍皇帝

 

敢問有多少人睇《白日之下》（In Broad Daylight）到寶珮如甚至林保怡時係沒憤慨的？小弟敢認是其一 - 戲裡的寶也似想窒余香凝：「不如我同你交換試下？我睇你最快三日最遲都只三個禮拜後，你咪又係會做出你依家對我氣憤的事。」

 

若簡君晉只想「揭露黑暗」，此片莫講最佳電影，就係開拍都沒啥意義：故事直取於老人院迫老人家露天沖涼及殘疾院舍院長性侵院友案件，這兩案結果人盡皆知，真唔知唔記得也可輕易查返，就如《正義迴廊》。你要氣憤，八年前也該真憤怒過，但憤怒完又如何？現實會否因激起你的憤怒而改變？說甚麼揭露出來就有機改變，早前《不止不休》都講過，且明眼人一聽都知係夢話。簡其實有沒責任，提醒觀眾別要太多幻想？

 

寶要反駁，最簡單就係拋黃子華金句：「我想架？」一人照料十數個院友，鬼唔知粗暴係最可恥卻無奈係做得最有效率；余初見林謊稱由加拿大返過來，林回佢：「加拿大好啊......」似背後之意為：「挑，你想話人地加拿大唔會好似我咁對待D老人家者，喂人地加拿大高稅收就行高福利社會架，好簡單你肯每月攞你份糧起碼三分一出來俾我去照顧班你唔識的老人家弱智人仕，你咪有資格挑剔我囉。」

 

起碼寶要虐待院友，只因受制有限資源，有限資源就因私營院舍只顧牟利，政府又會辯因奉行低稅率，沒太多資金只可委託私營院舍去應付有增無減之需求，需求有增無減只因每人都有各種藉口把照顧自己父母或子女委於他人.......記者「揭露真相」，卻得出人人皆幫兇，故縱有真心憤慨關注，但也只虛火三日，只因此為社會皆默許，你嬲只係你真心膠。「揭露真相」淪為只滿足大眾好奇眼球，頂多解決一角叫大快人心一下就可，根本沒有真正改變全局。余最後回到院舍，被幾所有院友叫罵：你以為帶他們脫離地獄，卻實係推他們更落一層而已。

 

再者挑起更多人憤慨都未必有用，現實幾年前幾百萬人曾憤慨過，但結果今天社會還真的「完善」？答案眾所鳩知，卻只能放於心底。《白日之下》或真要述係這無力感，起碼比《不止不休》真誠叫你別以為記者係無冕皇帝，當成個社會皆怯懦，你其實就只係九龍皇帝矣。