《女子監獄》- 忘了係監躉，以為學生妹

 

點解睇呂美鳳版的《女子監獄》(Prison Flowers)？講真你話給鍾欣潼周秀娜吳千語三位秀色吸引我都唔會笑你，你竟扮哂野話想睇女監是甚麼模樣我才真會恥笑：又話監獄裡煙當貨幣因只個個嗜煙如命，調轉頭幾條條女肌膚亮麗到反哂光，你唔好同我講話佢地平時又可以補下粉底用下SK2咁呀？

若你係三女粉絲，入場為睇阿嬌娜姐鬥法，會辯話做戲者駛唔駛咁認真？最大問題係女都太過鍚身，幾無個會「搲爛塊面」：阿嬌早年已勸過還不要再扮純情小姑娘，但至今佢除左西面卻就擺唔起狠樣；吳千語就只限於《青春鬥》《王家欣》裡那種港女，在外頭城市嬌生慣養，入監倉卻兇不起模樣，唯有要斯文起來屈身求存叫不耐煩；娜姐也如此令人失望，明明佢可以更撥辣古惑，但佢卻偏要懶正經。

 

呂及大部分演員或一開始就搞錯：點解要坐監？就係你犯左法，犯法係你本身有惡念。你話有被誣陷身不由己法律唔公正国安法之如此類，於是主角們都拿這些當入冊理由，扮無奈般常說自己其實想做好人：點解你睇娜姐說要改變監內遭受的唔公平總覺得唔順眼，正如對返《三五成群》問大王阿必等點解要組堆埋堆，佢地答話唔想給人恰 - 表面一樣意思，但大王明顯坦承只諗住自己，娜姐卻有種虛偽話口想顧埋其他人，就係唔會自認自私。就連李彩華明明扮哂兇狠，最後卻又自白都係想做好人，就係冇個會壞到盡；最後大決戰竟重要爭住唔好你來插費時你加監，於是明明可以成村人逐個插血流成河般轟烈，卻就要無端一舊石屎跌落求其收工了事。

 

大概只有吳家麗已係老戲骨，唔駛顧甚麼形象故演得最到位。其他就如天真嬌，忘記自己係入冊，像入學般想做好學生，當然就係四不像。粗獷鬥爭求存自然沒有，那脫多兩下給我養下眼卷總會有？噢差點忘記你們就係純情學生妹，當然這些也沒有，有都搵個替身就得。所以就算阿嬌娜姐三五成群一大班，都冇那套《三五成群》咁好睇。