《七人樂隊》- 想當年想到病

 

《七人樂隊》（The Story of Hong Kong）七個導演都係老野......呀唔係，以陳慧嫻標準去定，「老前輩」係袁和平譚家明許鞍華，「新生代」咪林嶺東徐克洪金寶杜琪峯。嗱三比四，夠均衡嘛。 

  

除徐克同林嶺東，五個沒一故事時空在今時，時間由五十年至二零零八止。咁總會有「技術問題」，例如影六十年代公屋總影著現代街燈同招牌，或說80s卻搵唔夠卡式帶而要聽CD。克服問題之法，就係鏡頭多中近，那就少影到其他野。 

 

論故事力度，洪金寶最慳水慳力：只係洪回憶細個點《練功》，練甚麼招式點給師父教訓，總之講自己點食鹽，當場流露毛病：只曬自己點辛苦，但有沒諗過咁辛苦為乜？ 

 

到許鞍華，主幹係吳鎮宇的《校長》，搭馬賽的老師。他倆像有幅牆相隔，故兩人沒甚麼交手。馬英年早逝，吳多年後聽到感慨，像後悔沒去衝破那面牆。其實兩人沒交流亦因身邊太多人：如三個頑皮學生，收回五蚊學費後又如何，總之就係長大成人，也就沒了下文。 

 

譚家明避了人多之弊，《別夜》只有余香凝吳澋滔兩人像舞台劇：女的要走男的要留，兩人態度均強硬，卻就係不能為自己作決定。故由朝糾纏到晚，最後一夜纏綿了結。值得一讚係真做哂衫地做，余露背還有半球，但電影始終清純，摑了某個懶純情真孤鳩寒的偽君子一巴。 

 

袁和平的《回歸》名不對題：或叫「漢堡與武功」仲岩D。講新舊中西互碰，但元華似佔太多，林愷鈴似陪襯。只講老人妥協試起新事，卻又少論年輕會欣賞舊事物。或係袁也自知自己已不懂年輕的心。 

 

杜琪峯的《遍地黃金》算係《奪命金》的現實，伍詠詩胡子彤徐浩昌三人組在九七至二零一零的股市樓市中追逐，但仍身在同一間茶餐廳 – 變的只係一堆數字，大家依然沒變原地踏步，所謂人玩金錢遊戲其實係人被金錢遊戲著。 

 

林嶺東最後作：任達華大鄉里出城，只認得舊中環，《迷路》到喪命街頭。側面算其自我批判：只念舊時卻沒想去適應當世，結果就給時代洪流掩沒 – 其《沖天火》正係水肚不服之例。 

 

徐克的《深度對話》：張達明張錦程劉國昌林雪同於一房內無厘頭，最後搞唔清誰是醫生誰病人 - 大家都有病。似係徐反嘲大家：「想當年」根本係逃避現實之病，頭六部幾沒套會想對現今對症下藥 - 現在香港在乎的已唔限於金錢、有沒問清楚到底移民為甚麼、你自誇被磨練一身好武功，但完全給你自己自high，遠不如另一套可演化解救危城的理論。當然你會辯銀河映像早就講明為拍電影而活，今世正如清朝雍乾，那時文人都興起考據，正如今日的《七人樂隊》。