《感動她77次》- 感動你老母

 

好少覺得睇邱禮濤係勉為其難，唯《感動她77次》 (77 Heartwarmings)，本來有念頭係戲都費時睇直接落筆，但最後都係搵間最平戲院拿拿聲睇左佢，雖然睇後都未太動搖睇前的定論。 

 

戲係典型的「二零一九前」作，由選角到故事放到現在都不合時宜 - 尤其男主角已經叫定一大班罷睇，主角彼此律師，節目平極都要食麥卡儂這唔實際甜品。這些都未到最要命，邱不嬲都係左仔，上次《原諒她77次》，明明男方唔太算卻被形容大惡之徒，根底原因係男人為高牆，所以點都企係作為雞蛋的女人一方。就係膠到誰是弱者搞不清，只怕畫面唔好睇輸民意，於是面對無賴毫無還手之力。點解略睇內容簡介已不想入場？就係Adam（周柏豪）覺得傷害Eva（蔡卓妍）於是就想去感動返佢七十七次，講得似香港覺激嬲小學雞中共，唯有落力奶其鞋底還要自摑幾把。 

 

有點出乎意料係感情還真唔止兩人的事：兩人的豬朋狗友插入來還未夠，又叫C君的無撚聊土豪、泰國靚仔 (Mario Maurer) 等做架兩。仲要惠英紅腦生癌又撞返舊情人，於是就七次都未夠卻一扭改去感動你老母。你罵離撚哂題，但邱卻厚著面皮如此解：就算係講雞蛋對高牆，但真係只限講這兩邊？就似以色列對巴勒斯坦，講佢兩個就唔使講埋隔離一排鄰國以至伊朗美國？你兩個唔係坐於孤島，有接觸其他就自然要拉埋隔離左右，國際如是，感情如是。 

 

於是乎男人認哂低威求女方原諒，女方又乘時吊高來賣，只因有第三選擇，又做了個講係開放實際未解決之結。男觀眾實睇到拍檯發爛搾，就像哈馬斯不知好歹向以色列射火箭，以色列即十倍奉還打到其求繞。以前港人還會懞盛盛企在巴人一邊，今日卻大多覺以色列反擊有理。只因經歷過二零一九，港人終分別到誰是真弱者定還是無賴，無賴就係屌人老母後重夠膽扮弱者以為唔使付代價。