《落葉殺人事件》 - 唔抵可憐

你問又唔係評坎坷影展作，起這標題是甚麼意思？的確拍獨立電影並非係折墮的等號，但你要我為這電影找個主題，我卻只想到這一句。

《落葉殺人事件》 (The Murders of Oiso) 說特別在港日的聯手，指係黃飛鵬來監製，三澤拓哉作導。一見片長就預料到定有問題：只有八十分鐘不到，主角已經係四人幫，還要四人又引伸出和女友、和父母祖母、甚至乎老闆的女人，多段關係俾得咁多時間肯定唔會細緻。

而且你叫我另想出個，或因本來主題實太無聊：敘述日本農村的困局，但黃似沒參詳《十年》其他系列，有他應提醒三澤：若只係這樣，其實呂柏勳的《路半》都有講，人地十幾分鐘比你更簡而精，台灣的農村比你更窮更無望，簡單講就係連慘都有得鬥但你又點同人鬥？

你話三澤想唔只係講那有錢你老母咁簡單：無錢無望就係衍生問題一堆 - 朋輩婆媳男女等等等等，卻似係打邊爐般想講甚麼就放下去，所以朋黨欺凌又跳到婆熄、突如奇來的男女關係再跳到非法傾倒、上唔著朋友女友就回憶返欺負過他人作結，像繞了個大圈卻又沒啥連貫，愈睇愈叫人問想點撚樣。

其實電影最叫人頂唔順的係意識 - 對比石井裕也，他會說若身在難感有望之地，一係你就隻身去東京發夢，一係你就抱著船到橋頭自然直，那管在福島都唔怕。但《落葉殺人事件》裡的人，卻又唔會出走，一味原地窩囊：聽到人們說摸你女友一下有乜所謂，你竟又一同嘻嘻哈哈，而你女友竟又忍到可恥的你。就係有人忍受不了，拿起酒瓶打死個人，難得一單有意義之事卻就係電影結束，花數十元票錢就係睇一班人係度怨係度廢，真係入廁所照下塊鏡都冇咁嬲。都係個句：唔努力就係冇可憐你的理由，正如給你一蚊你卻只在原地啥都不做沒去賺多一蚊，上帝只會把你踢到暗處咬牙切齒。