《3CM》 - 求條毛

《3CM》係講醫療權紀錄片，要比可用米高摩亞的《美國清一sick檔案》(Sicko)。

分野當然很多：黃肇邦係循規蹈矩的旁觀者，唔似米高簡直革命家 - 美國冇人幫你醫我就帶你去古巴；黃卻只默默注視這一個病患哭訴已到絕路，那一個病患者母親如何艱辛 - 你會嫌米高似在創作劇情，卻也會計較黃太過忠實：極端如《飢餓的蘇丹》，會怪責攝影師是否由得那小女孩喪命。

很快你都會覺得怪責導演簡直係痴撚線：有錢中產也只剛好負擔起自己女兒，看著他人就只能幫他們發聲埋一份，但口講真係無乜用，張超雄都話沒立法權的議員實係廢的。根本就係罕見疾病病人就算圍爐起來都力量太弱，連打著愛國旗號的地痞流氓收工男都大聲過佢地，人總係欺善怕惡，既然有人敢公然恥笑罕病病人連其母親都係抵死，那就別怪導演唔去插手做甚麼扭轉乾坤。

勢弱就係注定，雖然中產母親說生存係基本權利，但其他病患者母親都似乞求社會尤其政府憐憫，別講到這政府唔係由人民選出就話之你死，片裡醫生都說社會還是會計較用大筆資源只救你一個人根本不合成本效益。記得米高除了夠大聲，就係會指身旁病患係九一一災難英雄卻在美國不得治真夠荒謬，鏡頭一轉到聚焦那個患罕疾而呆滯的女孩，係唔好意思卻也會功利去想：她有甚麼貢獻值得我們去救她？

或不應這樣定義：若米高摩亞係鬥爭，《3CM》的方式就係求 - 唔話係乞求那麼難聽，都係謙卑地祈求，就係求會被「愛國」流氓叫囂引去目光的，都會擰轉頭望一下他們：就係外邦人自比為小狗向耶穌求恩賜之故事，亦係你們把政府當上帝才令他那麼囂張。你會話咁米高又成功鬥到制度了嗎？我就記得米高作出街後，奧巴馬就搞起全民醫保；《3CM》的結尾，就係「立法會通過無約束力議案要求保障罕病病人用藥權」一句完。「無約束力」，請看清楚這句話。