《我的筍盤男友》 - 老土的王子就只令深水埗落雪去搞掂灰姑娘

從來都覺得港女係錯愛了葉念琛，亦所以要理解香港的談戀愛還要看葉念琛。縱使他時而離地兼老撚土。

《我的筍盤男友》 (YOU ARE THE ONE) 唔駛查都諗到係一年前拍落的：今日連十二歲細路女都知道暴政不亡做有錢人都唔安樂，誰會稀罕變鳳凰？但一年前作為一個廿歲出頭港女，最大煩惱就係日做夜做五年也只儲到三十萬 - 這是首期也未夠找，如此無望有誰不會發夢想當灰姑娘？我信葉搵李靖筠做阿寶認真係無私慾之想，係有慾的叫倪晨曦先正路，但倪去扮灰姑娘卻肯定扮唔到，而叫李，就扮到了。

灰姑娘遇到王子變公主係求鳩其，這是葉想講的實是灰姑娘後記：灰姑娘依然純情，竟不習慣城堡的生活，自以為是的王子以為用金錢就能收服到灰姑娘，灰姑娘見王子不對她付出愛而拂袖而去，係之前一直問的灰姑娘和王子結合就一定幸福？但這故事莫講今天，就係《令人戰慄的格林童話》都會嫌不合時宜：古時王子係要常到遠處殺敵，有閒專心和公主談情說愛就只有只駐守城堡的侍衛。要王子專心去愛公主？王子倒下就夠閒去愛公主了。但公主還真會接受已倒下的王子之愛嗎？諗返施蟄存的《將軍底頭》結尾：被敵斬去頭顱的花將軍，趕回去見其所愛之村女，原似純情之村女見其無頭就嘲笑他並離去 - 要問灰姑娘是否真愛王子，還差一大個考驗。

結局係回到民間的灰姑娘，見到王子欲與她重修舊好卻推卻，說大家兩個世界的人，正如深水埗唔會落雪：一聽到呢句已忍唔住啤一聲，搶先三秒就諗到係天台擺製雪機咪得，當然先決係佢要財力雄厚的王子 - 始終都係錢唔係萬能但冇錢就萬萬不能。仲要係葉念琛搞亂了暴發戶和貴族：俾我係灰姑娘，我才看不起你這時勢仍窩囊躲在一邊大灑金錢來討好我，若你真是貴族，請你到前線斬妖除魔，你創造到一個和平的世代後，再來煲底向我求婚。