《吹哨人》 - 紅顏禍水

你話我這時勢還看鄰國的片，我回早就話講我看電影係興趣行先政治正確擺埋一邊，我認我有興趣的是湯唯，更有興趣是執導的薛曉路。

係薛才引出湯的實力，叫她搲爛塊面做大媽或爛賭婆卻又不失美態。失望的是今次卻很是保守 - 只係件微波爐都唔識用只識用錢不解世情的太子女，等於深田晃司新導日劇《真心愛著你》裡一味楚楚可憐女主角，是個不怎用力的角色。

話時話電影的香港行銷都一樣咁懶，《吹哨人》 (The Whistleblower) 這大陸名詞照搬來香港，香港人都不明所以。吹哨者，正式名詞叫舉報，香港俗語叫篤灰。若回到大陸，劇情按現實可以更加兇險，惜薛就係國內講唔出此故，就唯有把場景搬到國外；若篤灰真係主題，理應主角一係面臨應否去篤，還是篤後有甚麼遭遇。此套卻係男主角馬珂 (雷佳音)  和湯唯扮的周雯一夜纏綿後再一連串追殺，去到轉時才查夠證據去篤灰，如此架構係缺乏一個關口，要說教的話力有不逮。

明明去篤灰的係馬珂，理應主角卻相對被動，周雯卻主導著劇情：就係一個麻撚煩不斷製造問題給馬的紅顏禍水，故事的起承轉合都由她帶引出。最玩味就係周死了，原本眾叛親離的馬就得妻子親友等二話不說幫忙：這叫人想起余秋雨《白髮蘇州》裡講的吳人看西施 - 千夫所指為促成吳亡的禍首，卻又可憐對其指責未免太過，還真有此氣質者唯湯唯也。