《葉問外傳：張天志》 - 一地英雄盼黃昏

葉問早就給人玩到無野好玩，要不厭其煩就只好玩埋隔離左右。或者葉偉信都嫌玩到悶，《葉問外傳：張天志》 (Master Z: The Ip Man Legacy) 也就唯有交給袁和平。而袁再肯定告訴你：葉問等的故事，止於七十年代。

電影除了張天志，還有一個「英雄」由頭帶到尾 - 「黑蝙蝠」，他的存在令張好不尷尬：有錢的花花公子對無錢的帶子洪郞，更重要係蝙蝠俠世界裡他係唯我獨尊的英雄，張在自己的世界？對上唔係還有葉問，難聽點講他只係一個二流。

簡介話張頹廢地過其實不對，起碼他開士多，或做酒巴侍應過活，只係唔想去碰武術。棄武唔係輸一次就完，而係看透一街都係好打之人：黑道大家姐，或酒巴老闆，大家都不分上下時，何必一定有我？美式英雄係講能力愈大責任愈大，但既然大家都咁高咁大，那你要逞英雄就隨得你出去，唔打到我頭我費時出手。你可罵我懦弱，我只知我係睇透。

最重要係，人們期盼英雄時，都在惡人惡透半邊天，社會制度廢柴時。因此電影結束在一直忍氣吞聲的華人警察，懂開一槍宣示要做返英雄，制度制裁到惡人，更加唔需要英雄。話英雄止步70S，因這年廉署成立，香港黃金時代開啟，人人安居飽衣足食，英雄自此簡直多餘，也都安心回家吃飯去。

故此你窒張天志收收埋埋正懦夫也是罵錯，葉問都係唔想出眾，想出位係帶洋氣的李小龍。東方英雄係期待日落收山，有時間就諗下今晚食乜好，真是一個熱愛和平的民族也。