《億男》 - 講來講去咪又係窮屌你個西

大友啓史似就只會娛樂，你要他深度一點佢都係搞唔掂。

《億男》 (MILLION DOLLAR MAN) 的命題 - 勿做金錢奴隸，本來就唔係咩新鮮話：早幾年暢銷書《富爸爸．窮爸爸》已經咁講 - 窮人為追遂金錢而埋首工作叫「老鼠賽跑」；藤原龍也扮的種金佬千住向台下窮撚嘉賓叫嚷不要執迷「沒價值」的鈔票，要把目標回歸夢想。表面和應，轉頭千住又係執返哂「沒價值」的銀紙 - 嘲諷《富爸爸》其實咪又係風涼話。

命題講係好有道理，但都係迴避根底：點解要追逐金錢？好簡單因為冇而又需要咪要追囉。我不讓女兒學跳舞，就因為我沒有錢給學費，就唔係我重視錢多過女兒。一男（佐藤健）和萬佐子（黑木華）係講得唔清唔楚，萬口說本來可和他捱窮，那為何又要和一分居？到一向萬道出自己有三億可以怎樣那樣，萬不屑地說：「你真係變了。」表面係痛心一眼中只有錢而沒有屋企人，更深入的話語係：「你有錢又怎樣？你捨得用在我們身上嗎。」

於是一男買了女兒想要的單車，萬佐子見後笑逐顏開作結 - 即係金錢係買唔到親情，但你冇錢又係談唔起親情。若果一男最後都係三億復失，再講別理金錢或還可講得響亮。大友啓史就係技窮，都係度唔出一個叫窮人唔需為金錢煩惱的方法，「勿做金錢奴隸」結果只限講俾無需為錢而煩的人，講俾窮人只會引起屌聲四起。