《擂台物語》 - 有食而廢，上陣擋台繼續廢

一睇內容簡介就覺得叫悶的 - 《擂台物語》 (The Ringside Story) 又係講廢柴上擂台，唔好話《空手道》已講過，《百元之戀》仲早講過，武正晴當大家老人痴呆，公然翻炒，未免太混帳。

若你拿槍指小弟的頭，要好歹也說些好話：《百元之戀》裡安藤櫻的一子係一開始話我廢就廢關你屁事，《擂台物語》卻會問下點解瑛太扮的村上會淪廢柴：去唔到康城係度自暴自棄？現實早十年也有個李姓演員拍戲自呻無人賞識請他去荷里活，十年過去，有齊資源時間卻磨出一把爛劍。故用懷才不遇想叫人同情？別發夢了。你係有才就真的條條大路通羅馬，怨天尤人就係機會放到你嘴邊你都不會咬著 - 難得做第二男主角卻嫌似係小電影而擺款唔接，誰救到你？

有一幕反而講清楚做廢柴之因：加奈子 (佐藤江梨子) 被飯盒工場炒了後，仍和村上在日式意大利餐廳裡約會，仍點兩盤菜大吃大喝 - 無論如《東京夜空最深藍》裡你仿如微塵，或《芳華》裡被時代玩弄，你捱得過去的方法就係談戀愛。

戀愛說得簡單：窮極都有個錢讓你倆吃喝就搞掂，故此電影裡村上和加奈子可謂由頭食到尾：飯盒、日式意菜、螃蟹、餃子，竟幾做咗起承轉合。你話這未免太庸俗沒大志，那怎樣才算有大志？讀馬克思整炸彈想世界革命？Come on，電影裡已不斷提你這是資本主義的社會，你再想社會主義已不入流。更何況《地厚天高》裡梁天琦都話食係最開心的階段，時代革命家都認為有得食就得了。食飽就好，何需另有志？

反而一方「有為」起來，就招至戀愛的危機：說加奈子由北海道帶來螃蟹造成故事的轉，係因引發村上的妒忌 - 唔止係以為招至第三者，更重要係村上原以為和加奈子一同不外如是下去就好，怎料加奈子已遠遠「有用」過他。明明早就唔要尊嚴，卻又突然要起面子來，反覆可笑。更可笑的係加奈子眼見村上廢到谷底，忍痛嚷要離開，想激發村上前往擂台。但上到擂台的村上，卻係一拳就倒，就可交差離場。之後就算說是繼續追夢，實係二流繼續過，兩人繼續相依。成套電影唔止拳擊，還是飲飲食食，而係一種廢的氣氛由頭帶到尾。中後話激勵你要振作，但你振得一下就話你交夠差請明日繼續不切實際。真是一部他媽的唔講上進的電影。