這該是林超賢最矛盾的作品，《紅海行動》 (Operation
Red Sea) 裡斷手斷腳爆腸穿肚還真值上三級。問題係戲裡同時笑點特多，令人忍俊不禁到感受不到戰爭的慘烈。當然這又要你對國情有一定的認知，才識得去笑。
記者夏楠 (海清) 說係法籍華人，遇險後是但拿起個電話唔係想去打給法國領事館，而係打12308叫救命。趕到的蛟龍突擊隊隊長楊銳 (張譯) 指她係中國公民，任務就係保護她的安全 - 現實係中共唔認雙重國籍，既然夏擁法籍，按理就係話之你死；大概中共自以為在《戰狼2》成功賣出那本地球上最垃圾的護照，今次想照辦煮碗賣12308這叫中國人在外有乜頭暈身㷫中國大使館都幫到你的電話。玩起植入廣告，就唔爭在賣多一張信用卡，於是就沙漠逃亡時突然近鏡一張信用卡懶理你問做乜鳩；說是撤僑，即係逃難，但上船的僑民竟沒多個慌張，反而都舉起擺明預備好的國旗，面上都掛著興奮喜悅的神色，像參加郵輪假期般，林超賢你知唔知自己拍緊乜？
奇怪在就算林超賢真係不解國情，既然有解放軍大力幫拖，資料也早應有人幫手執正。再看電影裡的場景發生在叫個「伊維亞共和國」的地方，故此海報標題說甚麼根據二零一五年也門撤僑事件改篇，根本唔需理會，因成套情節都係天馬行空。其實更古怪係電影裡的意識：由口說不放棄拯救任何一個中國公民，不去想人家內政及侵犯人家領土，接住卻只靠夏楠的一絲情報，就「即興」直闖人家領土打柒所謂恐怖份子 - 這不似是中共一直嗤之以鼻的美國霸權主義嗎？怎麼中共又會玩上這套？
《紅海行動》這種電影大概實係中共「三朝國師」王滬寧的傑作：對錯不論、好壞不分，有用就行 - 既然會叫劉偉強用拍《古惑仔》的技倆拍《建軍大業》，這回也叫林超賢仿起《天擊戰線》或《黑鷹十五小時》，甚至更過之而無不及：開場中共海軍眼見海盜逃跑，說因其殺了中國人而要把他追到天腳底。到最後中共海軍在南海，一排戰艦向對面疑似美軍戰艦的示威 - 為響亮近年中共大吹的中國夢，於是昔日指責別人甚麼甚麼，今日都用起毫不尷尬。
原本林超賢見拍得場面慘烈或都會反省：戲裡一隊員因救兩村民而身陷巷子裡，伏在一邊眼看隔離靜悄悄的羊群，似突然諗到我究竟做緊乜？無奈給他這機會的不多，只因今日的林似淪為在叫大中華桑拿裡的機師，你幾何見過機師幫你打飛機時會勸告你這樣打下去會死的？看到這樣的林超賢，大概似告戒大家：投共自己揀，仆街唔好喊。
沒有留言:
張貼留言