《殺破狼‧貪狼》 - 人縱好打講就軟弱

或許「貪狼」兩字聽起來係威係勢，原本《殺破狼‧貪狼》 (Paradox) 係直接了當叫《貪狼》算的。但葉偉信接了故事，卻又照用《貪狼》兩字係捉蟲入屎忽，回家一查谷歌就懷疑，葉究竟清唔清楚「殺破狼」是甚麼意思？

或就係葉偉信故意設定：《貪狼》其實係繼承《殺破狼2》的寓意，更甚者用古天樂是為玩前世今生 - 上集的古正是在玩人體器官買賣，仲講過：「我救咁多人，我而家殺返一個人救我自己有咩問題？」於是上集的孽輪迴到今集，由他女兒來還。兩套主旨，其實都係講求生求全：今集古天樂(李忠志)只求保全女兒，對家林家棟(鄭漢守)也只係忠僕，只要保全其老細命子；依返紫微斗數解讀「貪狼」，唔講甚麼迷戀花色，其簡單講就是一字「貪」 - 你已有足夠的卻又唔滿足要更多才叫「貪」。明顯有別於「求」 - 你就係臨近失去才會想去「求」全。既然兩方都無所貪欲，那和「貪狼」有啥關係，主題和故事，擺明牛馬不相及。

若果不理「貪狼」，依二零零五年對「殺破狼」之解：「七殺破軍貪狼三星的變化既能創造，也能毀滅屬於你的美好世界。」《貪狼》係想追隨返第一套《殺破狼》：李忠志鄭漢守各自所為只求保住自己的美好世界，但他們彼此相沖，如同陳國忠和王寶，所以都係不嫌其煩再有一次撞車。只係分野在陳國忠王寶是開頭互相追逐而互撞，李鄭卻係中段不為意地相撞：若《殺破狼》係講各自知人不為己天誅地滅而要刻意鬥過你死我活，《貪狼》就係無意卻也無奈彼此遭殃 - 鄭最後向李說為何偏要殺他女兒取器官：「只係咁岩你個女係o個度。」這集則重人各自與命運對決，卻只係鬥到彼此。李鄭間有另一人崔傑(吳樾飾)，他是最與世無爭，卻就得到最良善的結果。

綜觀《殺破狼》到《貪狼》，縱使人都好打，但意識都係弱不禁風 - 拼命追尋自己想要的結果，要去到人互鬥或是與天鬥，都係冇好收場。也故此兩套除了會撞車，也要拍著個海灘 - 人自問多偉大，實情面對大海無量，你才醒覺自己如何的渺小無力。你話葉偉信講得唔好聽，無奈他係講出真話：你罵郭子健的意識軟弱，你恨香港人對中共軟弱，但你又憑甚麼去罵？當你看到海邊的巨浪湧上來，你又會怕得叫嚷欺山莫欺水，你才會醒悟自己其實都係軟皮蛇。