《建軍大業》 - 古惑大業

中共的建乜建物三部曲，《建軍大業》(The Founding Of An Army) 係最重要的一章。只因很簡單的道理：「建國」？沒有條件怎樣建國？「建黨」？沒有條件怎樣叫這黨繼續下去？「建軍」就係一切之條件，四一二後中共內竟還想主動繳械以換蔣介石再沒鎮壓之口實，唯毛澤東出面指你群人真壞了腦子，渣緊槍桿子才後往後出政權。今日常講的和理非非，很抱歉，中共早就不信了。

怪哉的是如此重要的題目，中共卻不再搵韓三平和黃建新，而係搵香港的劉偉強，沒錯，拍「古惑仔」、《無間道》那個。當中共想電影沾些港產味來統戰一下香港人，但為何就要找劉來拍？雖然中共唔係智商無下限，王晶高志森等人近年竭力奶共，但高明顯沒如此本事，王頂多只能拍四一二、《赤壁 - 決戰天下》裡夠膽講「難以統一不如三分」，中共豈會再信吳宇森？《智取威虎山》表現不錯，但徐克似乎還尚欠些東西。

劉係拍「古惑仔」，但「古」的「失敗」卻就係中共想要放在電影裡的：若沒鄭伊健在《97古惑仔戰無不勝》裡畫出腸地爆：「點解入黑社會？巴閉囉，英雄主義疊馬......但係我想話俾你聽：行錯路，無得返轉頭架。」沒多幾個人想到這是套講身不由己無奈的寓言，反而真的以為在頌揚英雄主義。中共唔怕自嘲係黑幫，反而睇準你班「廢青」觀眾都想扮陳浩南，於是「古惑仔」的技倆，都用在這套上毫不尷尬：汪精衛扮得像個小白臉，但其神色顯得像東星耀揚；毛澤東他媽的扮陳浩南，純樸的楊開慧真如細細粒；粗獷的賀龍似係大飛哥，年少林彪栗裕還真係單純的大天二。「古惑仔」都可以玩正邪，這套也如此照辦二元對立：國民黨唔係奸詐就窩囊 - 杜月笙殺害汪壽華時，情景仿似耀揚殺害大天二：「我係東星耀揚，今日來收你皮。」；共產黨則都英明神武，南昌起義後明明寡不敵眾敗逃，離開時神色卻意氣風發。

對比建國與建黨，《建軍大業》確係沒有那麼沉悶，但對唔讀歷史，沉迷埋堆扮大佬的廢青才有用 - 最後毛澤東「黨指揮搶」擲地有聲，真正扮哂大佬。有大陸人以前窒過港產片只懂懷舊，殊不知最懷舊其實就係中共：「古惑仔」你以為已擺落檯底鋪塵，卻冷不防就被人拿出翻拍，這教訓香港人與其跟人那套，還不如認清自己，堅守本位。

其實，香港人都係孫悟空，中共今鋪又可能被劉偉強玩了一鑊：扮老毛的係劉燁，而在陸川《王的盛宴》他是扮劉邦 - 一件項羽打過來時還在秦宮忙著3P的流氓。劉在暗串老毛往後究竟是甚麼人，當然，還是要你多讀一篇歷史，多看一套電影，才會理建劉的用心良苦。