《死開啲啦》 - 炒出套電影

早幾年，麥浚龍拍出《殭屍》時，就被大陸人嘲諷港產片只懂靠懷舊。港人卻生性反叛，見你破氣地罵，就知我是做對。於是由電視跳到電影的梁國斌，首作也是玩殭屍，就叫《死開啲啦》 (Get Outta Here) 。

都係殭屍，但玩法也會不同，麥玩的是畫面意念，梁卻係對白抵死。或者梁想講的不止這麼多：鄧顯祖話自己係英國人，沉睡百年卻迫著「彈返起身」，望返這個城市，誰建的，卻交到那人手裡的，卻搞到何等面貌的，有人會被激到彈返起身又有乜出奇？還是不拉扯到這麼遠？那講的還是你頭腦簡單到如何也意會得到：鄧起返身望到的城市，生是艱難，訓返落去也是艱難，皆因冇錢萬萬不能，且到了個比殭屍吸血更變態的地步，冇錢無法令你安身，也冇法令你葬身。戲裡人物頗多，但每人的說話，都離不開一個字：炒。

殭屍片也是玩到決戰大魔王，迫到人生冇定所死冇葬身之地的大地產商，原來又係頭吸血殭屍，寸也寸得夠盡。殭屍雞化身作憤怒鳥殺敗大魔頭，呼應懂聖經的港人，面對地產霸權，也期盼自己變作打倒哥利亞的大衛。但港人生不如死死不如生，都是這頭大魔王作惡？還是不要姓賴，沒有小鬼助紂為虐，利害如撒旦也孤掌難鳴：Apple父親炒樓、男友炒龕位，個個唯利是圖，《失戀急讓》也老早講過，大陸人不炒，地產商不炒，星斗市民為貪多兩個錢也會炒，誰沒有比誰更高尚。所以大魔王倒下，Apple也要叫喊：「呢地方唔撚係人住架！」。

最後Apple變了殭屍活了下來，叫鄧帶佢走，又係道出港人面對不堪，只會遠走逃避。根底也是講到鄧寧Apple變殭屍，也不會送她去死，就是知道Apple貪生怕死，話雖生也是不如死。其實本來也可殭屍曬太陽灰飛煙滅死得容易，但人在世也無本事推倒地產霸權，也無勇氣推倒生死定律，反轉制度往往係英雄，無奈英雄真係唔係話做就做到，這套港人自嘲的電影，更是諷刺港人就係做不起。

只寸港產片只懂懷舊，其實那人根本不了解香港，要寸就寸港產只懂去講個炒字，《維多利亞壹號》、《失戀急讓》、再到《死開啲啦》。都係講個炒字搞到港人自己人不像人。而且不是大魔王作惡，而係港人自作孽不可活，講咁多年都唔會吸取教訓，識寸一定寸呢D。